Ázerbaıjan avtokólik ákelýge shekteý engizýi múmkin

ASTANA. KAZINFORM – Ázerbaıjanda jeke tulǵalarǵa shetelden avtokólik ákelýge shekteý qoıý usynyldy. Bastama boıynsha bir adamǵa jylyna tek bir kólik ákelýge ruqsat etiledi, ony satý quqyǵynsyz. Al ekinshi kólik tek otbasy músheleri úshin ákelinýi múmkin jáne ol da satýǵa jatpaıdy.

Bul usynysty Ázerbaıjan avtomobıl dılerleri qaýymdastyǵynyń (ÁADQ) tóraǵasy Eııýb Alıev Minval agenttigine bergen suhbatynda aıtty.

Onyń sózinshe, jappaı ımporttaýshylar elge ákelingen kólikterdi sapaly qyzmetpen qamtamasyz etý úshin servıs ortalyqtaryn ashýy tıis.

Alıevtiń aıtýynsha, parallel ımport resmı dılerlerge de, tutynýshylarǵa da qıyndyqtar týǵyzady. Kóbine elge Qytaıdyń ishki naryǵyna arnalǵan kólikter jetkiziledi, olardyń máziri qytaı tilinde, resmı servıstik qyzmeti men kepildigi joq.

Ol mundaı kólikterdi satyp alǵan azamattar qymbat jóndeý shyǵyndaryna tap bolatynyn atap ótip, tutynýshylarǵa tek resmı dılerlerden kepildigi bar avtokólikterdi alýǵa keńes berdi.

Sondaı-aq Alıev Qytaıda ishki naryqqa arnalǵan kólikterdiń eksportyna qoıylatyn talaptardyń kúsheıtiletinin aıtty. Jańa erejelerge sáıkes, mundaı kólikterge qosymsha salyq salynyp, alty aı boıy syrtqa shyǵarýǵa tyıym salynýy múmkin. Bul jaǵdaıda jańa kólikter de paıdalanylǵan retinde esepteledi.

Qaýymdastyqtyń pikirinshe, usynylyp otyrǵan sharalar avtonaryqty retteýge, tutynýshylardyń quqyqtaryn qorǵaýǵa jáne resmı men jeke ımporttaýshylar arasyndaǵy ádil básekeni qamtamasyz etýge múmkindik beredi.

Buǵan deıin Qazaqstanda jeńildetilgen shartpen ákelinetin elektromobılderge arnalǵan 15 myń dana kvota tolyq paıdalanylǵany habarlanǵan bolatyn.