Azaptaýlarǵa jol bermeý boıynsha keshendi sharalar qabyldandy - Bas prokýratýra

ASTANA. QazAqparat – Prokýratýra organdary bıylǵy qańtardan bastap azaptaýlardy qoldaný faktileri boıynsha qylmystyq isterdi tergep-tekserip jatyr. Bul týraly QazAqparat Bas prokýratýranyń baspasóz qyzmetine silteme jasap habarlaıdy.

Jumysty reglamentteý úshin «Prokýratýra organdarynda azaptaýlar týraly qylmystyq isterdiń sotqa deıingi tergep-tekserilýin uıymdastyrý týraly» nusqaýlyq bekitilgen.

Tergeý tájirıbesi men tergeý sapasyn joǵarylatýdy jandandyrýmen qatar, Bas prokýratýra basqa da qylmystyq qýdalaý organdarymen birlese azaptaýlardyń aldyn alý boıynsha keshendi sharalar qabyldady.

Barlyq quqyq qorǵaý organdary men túzeý mekemelerinde túgeldeı beınebaqylaý engizý jumystary jalǵasyp jatyr.

Azaptaýlardy jasaý jaǵdaılary men sebepterin taldaý negizinde «Sotqa deıingi tergep-tekserý jáne jazany oryndaý satysynda azamattardyń konstıtýtsııalyq quqyqtary men bostandyqtaryn saqtaýdy qamtamsyz etý jónindegi nusqaýlyqty bekitý týraly» birlesken buıryq jasalyp, kúshine endi. Oǵan barlyq quqyq qorǵaý organdarynyń basshylary qol qoıdy. Maqsat – azaptaýlar jáne basqa da tergep-tekserýdiń ruqsat berilmegen ádisterine qarsy áreketter boıynsha sharalardyń tıimdiligin arttyrý.

Nusqaýlyqta quqyq qorǵaý organdaryna azamattardy tek jetkilikti málimetter bolǵan jaǵdaıda ǵana jetkizý týraly talaptar qaralǵan.

Tergeýshiden basqa, ókilettigi joq tulǵalardyń jetkizilgen azamattarmen qylmystyq quqyq buzýshylyqtyń mán-jaılary boıynsha qandaı da bir sóılesý, áńgimelesý jáne suraq qoıýdy júrgizýine tyıym salynǵan.

Jetkizilgen jáne ustalǵan azamattar shuǵyl túrde tergeý áreketterin júrgizý úshin arnaıy kabınetterge jóneltilýi qajet.

Arnaıy kabınetter standart boıynsha birinshi qabatta, aıqyn qabyrǵalarmen, beınebaqylaý kameralarymen jasaqtalady.

Ustalǵany týraly dereý onyń týysqanyna nemese tıisti tulǵaǵa habarlanýy tıis, olardyń baılanys málimetteri hattamada kórsetilýi qajet.

Azamattardy ustaý, jetkizý jáne alyp kelý negizdiligi men zańdylyǵyn qamtamasyz etýge, sondaı-aq azaptaýlar men basqa da qatań, adamgershiliksiz nemese namysty taptaýǵa jol bermeýge aýmaqtyq quqyq qorǵaý organdary basshylarynyń jeke jaýaptylyqtary bekitildi.

Aıǵaqtardy jınaý, jaýap alý jáne qajetti sot saraptamalaryn taǵaıyndaý boıynsha keıinge qaldyrylmaıtyn tergeý áreketterin júrgizý úshin azaptaýlar jasalǵan orynǵa prokýrordyń dereý shyǵýy boıynsha talaptar qoıyldy.

Osylaısha, quqyq qorǵaý organdarymen birlesken buıryqty iske asyrý – azamattardyń quqyqtaryn qorǵaýdy arttyrady.