Azamattyq qoǵamdy damytýǵa aıtýly úles qosyp otyrǵan parlamentarızm bedeli jyl saıyn artyp keledi - Joǵarǵy Sot tóraǵasy
Búgin Parlament Senatynda «Qazirgi zamanǵy parlamentarızm: qalyptasýy, damýy jáne zań shyǵarý protsesinde bılik tarmaqtary arasyndaǵy ózara is-qımyldy jetildirý» taqyrybynda ótip jatqan halyqaralyq konferentsııada QR Joǵarǵy Sotynyń tóraǵasy Bektas Beknazarov osylaı málim etti.
«Memlekettik bıliktiń úsh tarmaǵy ishinde Parlamenttiń orny erekshe. Óıtkeni, zań shyǵarý arqyly Qazaqstan halqy óz bıligin júzege asyrady. Sondyqtan, Parlamenttiń Prezıdentpen, Úkimetpen, sot bıligimen ózara qatynasynyń birtuttas júıesin qalyptastyra bilýi eldiń áleýmettik-ekonomıkalyq jaǵdaıyna, azamattardyń óz quqyqtary men bostandyqtaryn júzege asyrýǵa áser etedi», - deıdi B. Beknazarov.
Onyń sózine qaraǵanda, zań shyǵarýshy organ memlekettiń saıası mádenı ómirine de belsene aralasatyn, qoǵamnyń damýyna, órkendeýine, saıası turaqtylyǵyna meılinshe yqpal etetin saıası-áleýmettik, mádenı-quqyqtyq ınstıtýt bolyp tabylady. Al táýelsizdikten bergi kezeńde der kezinde qabyldanǵan zańdar qoǵamdyq tártiptiń bekýine, el tynyshtyǵy men ult birliginiń nyǵaıýyna yqpal etken.
«Bul ekonomıkanyń órleýi men halyqtyń ál-aýqatynyń jaqsarýyna jol ashty. Sondyqtan da, qazaqstandyq qoǵamnyń saıası ómirine belsene aralasyp, azamattyq qoǵamdy damytýǵa aıtýly úles qosyp otyrǵan parlamentarızm bedeli jyl saıyn artyp keledi dep esepteımin», - deıdi B. Beknazarov. Onyń sózine qaraǵanda, Qazaqstan Parlamentiniń qalyptasýy, zań shyǵarýshylyq aýqymynyń ósýi, biliktiliginiń artýy, sot júıesiniń de qarqyndy ózgerýine jol ashqan.
