Azamattyq qorǵaý organdary qyzmetkerleriniń áleýmettik mártebesi kóteriledi
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine azamattyq qorǵaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
- Negizgi baǵyttardyń biri - azamattyq qorǵaý qyzmetkerleriniń áleýmettik jaǵdaılaryn jaqsartý. Búgingi kúni azamattyq qorǵaý qyzmetkerlerine turǵyn úı ótemaqysy jáne qyzmeti boıynsha basqa óńirge kóshkeni úshin qosymsha aqy tólenbeıdi. Bul tólemderdi belgileý qyzmetkerlerge, ásirese jyljymaıtyn múlik quny qymbat óńirlerde turǵyn úı shyǵyndaryn óteýge kómektesedi. Sonymen qatar, ómir súrý jaǵdaılary qaýipti shalǵaı jáne jetýi qıyn jerlerde, atap aıtqanda tótenshe jaǵdaı, áskerı nemese tótenshe jaǵdaı jarııalanǵan jerde jumys istegeni úshin ótemaqy tólenbeıdi, sanatorııalyq-saýyqtyrý em-domymen qamtamasyz etilmeıdi. Sondaı-aq kazarmalyq jaǵdaıda bolǵany úshin tamaqtandyrý qarastyrylmaǵan. Osy ótemaqylar qyzmetkerlerge olardyń kásibı qyzmetterine baılanysty tónetin qaýip-qaterler men qıyndyqtardy óteıdi, - dedi QR Tótenshe jaǵdaılar mınıstri Shyńǵys Árinov.
Onyń aıtýynsha, turǵyn úı tólemderi men ústemeaqylardy belgileý bilikti mamandardy tartýǵa jáne olardyń turaqty jumys isteýine, sondaı-aq olardyń qarjylyq jaǵdaıyn jaqsartýǵa kómektesedi.
Atap aıtqanda, adamdar jappaı jınalatyn obektilerdi saqtandyrý júıesi engizilip jatyr.
- Sońǵy jyldary adamdar jappaı jınalatyn obektiler men bıik ǵımarattardy órt normalaryn saqtamaı salý jaǵdaılary jıilep ketti, keıin onyń saldary órtterdiń oryn alýy men adam ólimine ákelýi múmkin. Osyǵan baılanysty Mınıstrlikke bıiktigi 28 metrden asatyn ǵımarattar men adamdar jappaı jınalatyn obektilerdi paıdalanýǵa berý kezinde órt qaýipsizdigi talaptaryna sáıkestigi týraly qorytyndy berý ókilettigi bekitiledi. Sondaı-aq jańadan jobalanatyn «Han Shatyr» ári «EKSPO» sııaqty qurylysy erekshe nysandarǵa qatysty arnaıy tehnıkalyq sharttardy kelisý normasy engizilip otyr, - dedi mınıstr.
Ónerkásiptik qaýipsizdik boıynsha aıtar bolsam, óndiristegi avarııalardyń negizgi sebebi - jabdyqtardyń tozýy. Búgingi tańda jabdyqty aýystyrýdy kóbinese qysqa merzimde qaıta qarjylandyrýǵa múddeli emes obekti ıeleri ózderi júzege asyrady. Tehnologııalardy, qural-jabdyqtardy jáne jumys ádisterimen birge, qaıta jabdyqtaý protsesin tıimdi uıymdastyrý úshin mınıstrlikke qaýipti óndiristik obektilerdi jańartý men tehnıkalyq qaıta jabdyqtaýdyń jıyntyq josparyn kelisý ókilettigi beriledi.
Sonymen qatar, týrısterdiń qaýipsizdigine qatysty jańa normalar engizilip jatyr.
Munymen qosa, mınıstrlikke seısmıkalyq qaýiptilikke baǵalaý júrgizý ókilettigi beriledi.