Azamattyq avıatsııa akademııasyna erekshe mártebe berilmek

ASTANA. KAZINFORM — Bıyl jyl sońyna deıin «Azamattyq avıatsııa akademııasy» aktsıonerlik qoǵamyna erekshe mártebe beriledi.

Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.

— Kólik mınıstrligi múddeli memlekettik organdarmen birlesip ázirlep jatqan akademııany damytý jónindegi jol kartasynyń aıasynda osy jyldyń sońyna deıin oǵan erekshe mártebe berý is-sharasy kózdelgen. Budan basqa, jol kartasynda avıatsııalyq zertteýler ǵylymı-zertteý ınstıtýty men pılotsyz avıatsııa ortalyǵyn qurý, jasandy ıntellektti qoldana otyryp, salany tsıfrlandyrý, ushý mektebin qajetti ınfraqurylymmen qamtamasyz etý jónindegi is-sharalar jáne taǵy basqalary engizilgen, — dedi Úkimet basshysy jaýabynda.

Onyń dereginshe, akademııanyń professor-oqytýshylar quramy — 126 qyzmetker, olardyń 38-iniń ǵylymı dárejesi bar jáne 6-ýy avıatsııa salasynda qyzmet etip júrgen mamandar. Oqytýdy tájirıbeli mamandar — Boeing-767/757, Airbus-319/320/321 áýe kemeleriniń ushqyshtary men komandırleri júrgizedi. Olardyń jalpy ushý ýaqyty 15 myń saǵattan asady. Sonymen qatar, akademııada jyl saıyn sheteldik ǵalymdar dáris oqyp, birlesken ǵylymı-ádistemelik jumystarǵa tartylatyn tájirıbe almasý baǵdarlamalary jumys isteıdi.

— Sondaı-aq akademııanyń bilim berý strategııasy aıasynda halyqaralyq avıatsııalyq ortalyqtarda oqytýdy uıymdastyrý arqyly oqytýshylar turaqty negizde biliktiligin arttyrady. Munan bólek, eldiń negizgi avıakásiporyndary («Air Astana» AQ, «SCAT» AQ jáne «Qazaeronavıgatsııa» RMK) menshikti qarajaty esebinen turaqty túrde kadrlardy qaıta daıarlaýdy (shetelde mamandar oqytý) júrgizedi, — dedi Premer-Mınıstr.

Buǵan deıin elimizde azamattyq avıatsııany damytý strategııasy qashan qurylatyny aıtyldy.