Aıyppuldy e-Salyq Azamat qosymshasynan tekserýge bolady

NUR-SULTAN. QazAqparat - E-Salyq Azamat mobıldi qosymshasynda aıyppuldy tekserý fýnktsııasy paıda boldy, dep habarlaıdy QazAqparat tilshisi.

E-Salyq Azamat mobıldi qosymshasyn ázirleýshiler qoldanystaǵy qyzmetterge ákimshilik quqyq buzýshylyqtar úshin tólenbegen aıyppuldardy tekserý múmkindigin qosty.

Qosymsha arqyly aıyppul túrin jáne memlekettik kirister organynyń kodyn kórsete otyryp, «rekvızıtter boıynsha tóleý» qyzmetinde júzege asyrý múmkin.

«Bul fýnktsııa qoljetimdi bolýy úshin AppStore nemese PlayMarket-te mobıldi qosymshany jańartý qajet (mobıldi qurylǵy modeline baılanysty)», - dep atap ótedi QR Qarjy mınıstrliginiń memlekettik kirister komıtetinen.

Vedomstvo málimetinshe, e-Salyq Azamat mobıldi qosymshasyn qoldanýshylar sany artyp kele jatyr. Qoldanýshylar sany 700 myń adamǵa jetti.

«Qazirgi kezdegi eń suranysqa ıe qyzmet – jalpyǵa birdeı deklaratsııalaýdyń birinshi kezeńinde deklaratsııany tapsyrý qyzmeti. Búgingi tańda mobıldi qosymshanyń kómegimen 308 405 qazaqstandyq deklaratsııa tapsyrdy» delingen komıtet habarlamasynda.

E-Salyq Azamat tegin mobıldi qosymshasyn App Store nemese Play Market-ten júkteýge bolady.

Avtorızatsııa ádisteri týraly aqparat mobıldi qosymshada bar. Qosymshany paıdalaný boıynsha qadamdyq nusqaýlar MKK YouTube kanalynda ornalastyrylǵan.

Tolyǵyraq aqparatty QR Qarjy mınıstrligi memlekettik kirister komıtetiniń saıtynan nemese «1414» telefony boıynsha alýǵa bolady.