Aıtys aqyny Nurmat Mansur jańa qyzmetke taǵaıyndaldy
Aıtysker aqyn Nurmat Mansur Qyzylordadaǵy qalalyq «Jastar teatrynyń» dırektory laýazymyna taǵaıyndaldy. Bul týraly Qyzylorda qalasy ákimdiginiń baspasóz qyzmeti habarlady.
Qyzylorda qalalyq mádenıet jáne sport bóliminiń arnaıy konkýrstyq komıssııasy sheshimimen osy ýaqytqa deıin M.Eralıeva atyndaǵy mádenıet úıiniń dırektory qyzmetin atqarǵan Mansurov Nurmat Abdollauly 2024 jyldyń 04 qańtarynan bastap qalalyq «Jastar teatry» memlekettik kommýnaldyq qazynalyq kásipornynyń dırektory laýazymyna taǵaıyndaldy.
Nurmat Abdollauly 1985 jyly 24 naýryzda Qyzylorda oblysy, Syrdarııa aýdanynda dúnıege kelgen.
Bilimi joǵary, ekonomıka ǵylymdarynyń magıstri.
Ár jyldary Qyzylorda oblystyq mádenıet basqarmasyna qarasty Halyq shyǵarmashylyǵyn damytý jáne mádenı prodıýserlik ortalyǵynda mádenı qyzmetker, aımaqtyq «Qoǵam» telearnasynda redaktor, respýblıkalyq «Tanym men Taǵylym» gazetinde atqarýshy dırektor, «Qazaq radıolary» JShS-ne qarasty «Shalqar» radıosynda aǵa redaktor bolyp eńbek jolynan ótken.
Respýblıkalyq, Halyqaralyq deńgeıdegi aıtystardyń birneshe dúrkin jeńimpazy, «Serper» syılyǵynyń ıegeri, QR Mádenıet salasynyń úzdigi, Syrdarııa aýdanynyń Qurmetti azamaty.
QR Qurmet gramotasynyń ıegeri.
Nurmat Abdollauly Jalaǵash aýdany, Syrdarııa aýdanynyń mýzykalyq murasy, osy aýdandardan shyqqan ádebıet, óner tulǵalary jaıly aýdıohabarlar, jyr-terme, ánder, aıtystar toptastyrylǵan «Jalaǵash jaýharlary», «Arnasyn jyr kernegen Syrdarııa» atty aýdıoantologııalardyń avtory ári prodıýseri bolyp aımaqtyń mádenı jaýharlaryn túgendeýde ólsheýsiz eńbek etip keledi.
