Aıt kúnderi elorda meshitterinde baǵyttaý ortalyqtary jumys isteıdi

NUR-SULTAN. QazAqparat - Elimizde engizilgen karantın rejımine oraı bıylǵy Qurban aıt merekesinde Elorda ókildigi boıynsha «Qurban aıtta qýandyr!» jobasy iske qosyldy, dep habarlaıdy QazAqparat Qazaqstan musylmandary dinı basqarmasynyń (QMDB) resmı saıtyna silteme jasap.

Joba aıasynda arnaıy meshit anyqtamalyǵy iske qosylyp, soıǵan qurbandyǵynyń etin qulshylyq ordasyna ákelip bergisi kelgen jandarǵa QMDB «Zeket» qoryna qurbandyq etin alýǵa ótinish bildirgen otbasylar mekenjaıy usynylyp otyrmaq. Qulshylyq ordalarynda aıt kúnderi et qabyldaý sharasy júrgizilmeıdi.

«Isi musylmannyń ulyq merekesinde baýyryńyzǵa qaraılasyp, qurbandyq etimen bóliskińiz kelse, óz qolyńyzben tabystap, etene tanysa túsýińizge taptyrmas múmkindik. Ol úshin meshit anyqtamalyǵynan bir otbasynyń mekenjaıyn alyp, aıtpen quttyqtap baryńyz! Tek qaýipsizdik jáne saqtyq sharalaryn qatań saqtaýdy eskertemiz!»,-delingen aqparatta.

Aıta keteıik, Qazaqstan musylmandary dinı basqarmasy bıylǵy jaǵdaıǵa baılanysty qaýipti indetti aldyn alý maqsatynda QURBAN2020.KZ saıtyn iske qosqan bolatyn. Qazirgi kezde atalmysh saıttyń resmı málimetine súıensek, Nur-Sultan qalasy boıynsha qurbandyq etin alýǵa ótinish bildirgender sany 4 myńnan asqan.

Meshit anyqtamalyǵy: 8 7172 422 455
8 777 957 28 34
Janat – «Áziret Sultan» meshitiniń ustazy