Aımaqtyń áleýmettik-ekonomıkalyq damýyn egjeı-tegjeıli talqylaýymyz qajet – Prezıdent

ASTANA. KAZINFORM – Memleket basshysy Qasym-Jomart Toqaevtyń tóraǵalyǵymen Mańǵystaý oblysynyń áleýmettik-ekonomıkalyq damýy jónindegi keńes bastaldy. Bul týraly Aqordanyń baspasóz qyzmeti habarlady. 

Basqosýda Prezıdent Mańǵystaý oblysynyń tynys-tirshiligin erekshe nazarda ustaıtynyn erekshe atap ótti. 

– Men búgin Aqtaýǵa jumys saparymen arnaıy kelip otyrmyn. Basty maqsat – oblystyń ahýalymen tanysý, aımaqtaǵy ózekti máselelerdi talqylaý. Elimiz úshin Mańǵystaýdyń orny bólek. Bul – strategııalyq mańyzy bar aımaq. Mańǵystaýdy batys qaqpasy deýge bolady. Men oblystyń tynys-tirshiligin erekshe nazarda ustaımyn. Sondyqtan búgin aımaqtyń áleýmettik-ekonomıkalyq damý barysyn egjeı-tegjeıli talqylaýymyz qajet, - dedi Qasym-Jomart Toqaev. 

Memleke basshysy óz kezeginde oblystaǵy halyq sany bir mıllıonǵa jetýi yqtımal ekenin aıtty. 

– Aımaqtyń jalpy ónimi eki jylda 1,3 esege ósti. Ótken jyldyń bastapqy 9 aıynda óńirlik jalpy ónim 3,7 trıllıon teńgege jetti. Bul kórsetkish, bir qaraǵanda, jaman emes. Bıyl birinshi toqsandaǵy ekonomıkalyq ındıkator 104,8 paıyz boldy. Oblysqa keıingi eki jylda 2 trıllıon teńgeden astam ınvestıtsııa tartyldy.

Aımaq turǵyndarynyń sany úzdiksiz ósip keledi. Qazir munda 800 myńnan astam adam turady. Jaqynda men Shymkentke barǵanda kóshi-qondy, ıaǵnı, mıgratsııany baqylaýsyz qaldyrýǵa bolmaıdy dep aıttym. Boljam boıynsha kóp uzamaı oblystaǵy halyq sany bir mıllıonǵa jetýi yqtımal, tipti, odan asýy da múmkin. Bul jaǵdaı ekonomıkaǵa jáne áleýmettik ınfraqurylymǵa qosymsha salmaq túsiredi. Bul faktordy umytpaýymyz kerek, popýlızmge urynbaǵan jón, - dedi Prezıdent. 

Keńes otyrysynda Qasym-Jomart Toqaev aımaqty damytý boıynsha birqatar tapsyrma júktegenin, taıaý arada nátıje kútetinin jetkizdi. 

– Men buǵan deıin taza aýyz sý máselesin sheshýdi, bilim berý jáne densaýlyq saqtaý júıesin jaqsartýdy tapsyrdym. Azyq-túlik qaýipsizdigin qamtamasyz etý, kólik-logıstıka áleýetin arttyrý jáne týrızm salasyn damytý jóninde naqty mindetter qoıyldy. Biraz sharýa jasalǵan. Jetistikter az emes, biraq kemshilikter de bar. Ony moıyndaý kerek jáne ashyq aıtý qajet. 

Naqty jospar bar, mindetter – belgili. Ózekti máselelerdi sheshý úshin Úkimet pen ákimdik kúsh jumyldyryp, belsendi jumys isteýge tıis. Ákim Nurdáýlet Qılybaı jumysyna belsendi túrde kiristi, aldynda turǵan mindetterdi, máselelerdi túsinedi, olardy sheshý joldaryn biledi. Taıaý arada nátıjelerdi kútemin. Onyń kótergen máseleleri – óte ózekti, bul máselelerdi Úkimet muqııat qaraýy kerek. Basty maqsat – oblys turǵyndarynyń turmys sapasyn jaqsartý. Bul – anyq nárse, - dedi Memleket basshysy.