Áıelin órtep jibergen Taraz turǵyny ózine qol jumsady

TARAZ. KAZINFORM — Tarazda er adam óz úıine ot qoıǵan. Sol kezde úıde bolǵan áıeli jansaqtaý bóliminde qaıtys boldy. Keıinnen úıdiń mańynan otaǵasynyń máıiti tabyldy. 

«Jaqynda túrmeden bosap shyqqan 54 jastaǵy er adam men áıeliniń arasynda janjal bolǵan. Sol kezde úı ıesi úıdi órtep jibergen. Keıin óz-ózine qol jumsaǵan. Onyń denesi óz úıiniń mańynan tabyldy. Denesin kúıik shalǵan áıeli aýrýhanada qaıtys boldy. Atalǵan derekke qatysty qajetti saraptamalar taǵaıyndaldy», — delingen Jambyl oblystyq PD baspasóz qyzmeti taratqan aqparatta.

Buǵan deıin Tarazda qasaqana órtelgen úıdiń ishinde áıel kóz jumǵanyn habarlaǵan bolatynbyz.

Ony qutqarýshylar jedel járdemge tapsyryp, aýrýhanaǵa jetkizilgen edi.

Denesiniń 98 paıyzyn kúıik shalǵan. Búgin tańerteń áıel esin jımastan jan tapsyrdy.