Áıelin oqtaýmen uryp óltirgen qaskóı 10 jylǵa sottaldy
ATYRAÝ. KAZINFORM — Atyraýda áıelin oqtaýmen basynan birneshe ret uryp óltirgen 41 jastaǵy adam 10 jylǵa bas bostandyǵynan aıyryldy.
Úkimdi Atyraý oblysynyń qylmystyq ister jónindegi mamandandyrylǵan aýdanaralyq sotynda sýdıa Tynyshtyq Nýrımova oqydy.
Sottalýshy QR Qylmystyq kodeksiniń 99-baby 1 bóligi «Adamdy quqyqqa qarsy qasaqana qazaǵa ushyratý» boıynsha kináli dep tanyldy.
Ol jazasyn qaýipsizdigi ortasha mekemede óteıdi.
Jaza óteý merzimi 2025 jyldyń 19 tamyzynan esepteledi. Ýaqytsha ustaý ızolıatorynda otyrǵan ár kúni jazasyn óteý kezinde 1,5 kún bolyp esepteledi.
Aıyptalýshy sońǵy sózinde marqumnyń ata-anasynan, jaqyndarynan jáne týǵan 2 qyzynan keshirim surady. Bul iske qatty ókinetinin jetkizdi.
Oqıǵa osy jyldyń 19 tamyzynda bolǵan. Erli-zaıypty ishimdik iship, keıin janjaldasqan. Er adam áıeline qyzǵanysh sezimin bildirip, as úıdegi oqtaýmen aıaýsyz uryp tastaǵan. 40 jastaǵy kelinshek esin jımastan qaıtys boldy. Osy jaǵdaı kezinde otbasydaǵy kishkentaı 2 qyz jatyn bólmede uıyqtap jatqan.
Osyǵan deıin Jambyl oblysynda turmystyq zorlyq-zombylyq kórgen 70 áıel kómek suraǵanyn jazǵanbyz.