Áıelimen ursysyp qalǵan aqtóbelik aıaldamany talqandady

AQTÓBE. KAZINFORM — Polıtsııa ákimshilik hattama toltyryp, ýaqytsha qamaýǵa aldy.

Aqtóbelik turǵyn Jalańtós batyr dańǵylyndaǵy aıaldamany aıaǵymen bir teýip, syndyryp jibergen. Bul kóliktiń beınetirkeý qurylǵysyna túsip qalyp, áleýmettik jelige tarap ketti. 

Polıtsııa qyzmetkerleri aıaldamany búldirgen aqtóbelikti dereý anyqtady. Aqtóbe qalalyq polıtsııa basqarmasynyń bastyǵy Aset Qalıev onymen sóılesip, ne úshin istegenin surady.

— Ol óziniń kinásin moıyndap, zańnamada qarastyrylǵan jaýapkershilikti qabyldaýǵa daıyn ekenin bildirdi. Qazirgi ýaqytta aqtóbelik polıtsııa bólimshesinde. Protsessýaldy sheshim qabyldanǵansha otyrady, — dedi oblystyq PD baspasóz qyzmeti.

Vıdeodan aıaldamada úsh adamnyń turǵanyn kórýge bolady. Onyń biri áıel. Aqtóbelik dál sol kezde áıelimen ursysyp, ashýlanǵan soń syndyrǵanyn moıyndady. 

Eske salsaq, Aqtóbe qalasynda aıaldama, jaryqshamdar, balalardyń oıyn alańdaryndaǵy átkenshek, syrǵanaq, oryndyqtar, avtobýs ishi jıi búlinedi. Psıhologter bul ómirge ókpesi bar adamdardyń tirligi ekenin aıtty.