Áıeldi uryp-soqty dep aıyptalǵan aqtóbelik ákim aıyppul tóleıdi

AQTÓBE. KAZINFORM – Sot Qandyaǵash qalasynyń ákimi Qazbek Aqqaıyrdy kináli dep tanyp, 80 AEK kóleminde aıyppul saldy. Azamattyq talap aryz ishinara qanaǵattandyryldy.

Muǵaljar aýdandyq sotynda Qandyaǵash qalasynyń ákimi Qazbek Aqqaıyrǵa qatysty is qaraldy. Ákimge Qylmystyq kodekstiń «Uryp-soǵý» baby boıynsha aıyp taǵyldy.

- Qazbek Aqqaıyr Qylmystyq kodekstiń 109-1-baby 1-bóliginde kózdelgen qylmystyq teris qylyq jasaǵany úshin kináli dep tanylsyn. Oǵan 80 AEK, ıaǵnı, 314 560 teńge kóleminde aıyppul salý túrindegi jaza taǵaıyndalsyn. Azamattyq talapkerdiń moraldyq shyǵyn óndirý túrindegi azamattyq talap aryzy ishinara qanaǵattandyrylsyn. Qazbek Aqqaıyrdan 100 myń teńge moraldyq zııan jáne 1966 teńge memlekettik baj óndirilsin. Sottalýshydan jábirlenýshi paıdasyna ókildiń shyǵyny retinde 100 myń teńge óndirilsin. Úkimniń azamattyq talap bóligin erikti túrde oryndaý úshin úkim zańdy kúshine engennen bastap 15 táýlik merzim belgilensin. Úkim jarııalanǵan kúnnen bastap 15 táýlik ishinde Aqtóbe oblystyq sotyna apellıatsııalyq shaǵym túsirýge quqyly, - dedi Ǵanı Almahanov.

Sýdıa bas-mı shaıqalýy, moıyndaǵy aýyrsyný birinshi saraptama qorytyndysy kezinde dálelin tapty dep túsindirdi. Al ózge sarapshylar dene jaraqatynyń aýyrlyǵy boıynsha ǵana taldaý júrgize alatynyn aıtqan.

- Hat almasý, aýdıo jazbalardan sottalýshy men jábirlenýshi aralarynda oqıǵaǵa deıin de, oqıǵadan keıin de janjal bolǵany anyqtaldy. Oqıǵa óz dálelin taýyp otyr dep kórsetiledi, - dedi sýdıa.

Aıta keteıik, Qandyaǵash qalasynyń ákimi Qazbek Aıqqaıyrǵa Qylmystyq kodekstiń «Uryp-soǵý» baby boıynsha aıyp taǵyldy.

Prokýror jaryssózde Qandyaǵash qalasynyń ákimi Qazbek Aqqaıyrdy aıypty dep tanyp, 80 AEK kóleminde aıyppul tóleý túrindegi jaza taǵaıyndaýdy surady.