Aıdos Sarym: 2030 jylǵa deıingi Іshki saıasat doktrınasyn qabyldaý kerek

BÝRABAI. KAZINFORM – Prezıdent Qasym-Jomart Toqaevtyń qatysýymen ótip jatqan  Ulttyq quryltaıdyń IV otyrysynda quryltaı múshesi, Májilis depýtaty Aıdos Sarym  2030 jylǵa deıingi Іshki saıasat doktrınasyn qabyldaýdy usyndy.

- Іshki saıasat kontseptsııasyn qabyldaý qajet. Sońǵy kezde qoǵam ishinde, baspasóz betinde, áleýmettik jelilerde Qazaqstanǵa jańa memlekettik ıdeologııa qajet degen syńaıdaǵy pikirler kúnde aıtylyp jatyr. Menińshe, ıdeologııaǵa degen suranys, jańa ıdeologııany talap etý belgili bir saıası-tarıhı kezeńniń aıaqtalǵanyn bildiredi. Jalpy alǵanda, Qazaqstan tarıhynyń jańa kezeńin, «Biz kimbiz?», «Qaıdan shyqtyq?», «Qaıda bara jatyrmyz?», «Kim jáne qandaı bolýymyz shart?» deıtin sııaqty suraqtarǵa jaýap izdeýdiń ózin jaqsylyqqa joryǵym keledi. Osy suraqtarǵa shynaıy jaýap bere alsaq, bolashaqtaǵy bolmysymyzdy aıqyndap, qıyn kezeńderden, tarıhı synaqtardan aman shyǵa alamyz dep oılaımyn, - dedi ol.

Ulttyq quryltaı múshesi atalǵan tujyrymdama buǵan deıingi quryltaı otyrystarynan iriktelip shyqqan ozyq bastamalardy ón boıyna toptastyrý kerektigin aıtady.

- Osy sebepti kópshiliktiń talap-tilegin eskere otyryp, Prezıdentimiz sońǵy úsh jylda aıqyndaǵan, úsh quryltaıda talqylanǵan, ýaqyt elegi men qoǵam talqysynan ótken qundylyqtardy toptastyrǵan, kemi 2030 jylǵa deıingi ýaqytta qamtıtyn Іshki saıasat doktrınasy nemese kontseptsııasy qabyldanýy kerek dep sanaımyn, - dedi Májilis depýtaty.

Aıdos Sarym elde memlekettik ıdeologııanyń ornyqpaý sebepterin aıqyndap, odan arylý kerektigin aıtady.

- Osy kezge deıin elimizde birneshe ret ıdeologııalyq saıasat tujyrymdamasyn jasaý úshin talpynys jasalǵany belgili. Alaıda onyń kópshilik qoldaýyna ıe bolmaýyna postkommýnıstik ınertsııa, qoǵamnyń etno-demografııalyq quramy Qazaqstan qoǵamy men onyń aımaqtarynyń árkelkiligi, ıdeologııalyq narratıvterdiń árkelkiligi, ıdeologııa men shynaıy ómir, sóz ben is arasyndaǵy alshaqtyq belgili bir dárejede kedergi boldy. Búginde sovet zamany keremet bir taza, izi kezeń deıtin narratıv qalyptasty. Al shyn máninde bizdegi qylmys ta, qylmystyq sana da, jemqorlyq ta, paraqorlyq ta sovet kezeńinen bastalyp, jalǵasyp, údep ketken qubylys. Olarǵa naryqtyq ekonomıkanyń da, demokratııanyń da esh qatysy joq, - dedi Ulttyq quryltaı múshesi.

Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy. 

Buǵan deıin Mádenıet jáne aqparat mınıstri Aıda Balaeva jıynnyń alǵashqy kúninde aıtylǵan usynystar týraly málimet bergen edi. 

Al Ǵylym jáne joǵary bilim mınıstri Saıasat Nurbek Ulttyq quryltaıdyń 4-otyrysy aıasynda Qazaqstan tarıhynyń jańa akademııalyq basylymy ázirlenetinin aıtty.

2022 jyly Ulttyq quryltaı alǵash jandanǵannan beri eldegi áleýmettik-ekonomıkalyq máseleler sheshimin taýyp keledi. Jyl ótken saıyn taqyryp aıasy keńidi, aıtylatyn salmaqty oı ulǵaıdy.