Aıdyń tutylýy: túngi aspannan fotoreportaj
ASTANA. KAZINFORM - Qazaqstandyqtar Aıdyń eń uzaq, tolyq tutylýyna kýá boldy. Biregeı tabıǵat qubylysy qyrkúıektiń 8-ine qaraǵan túni aıaqtaldy.
Fesenkov atyndaǵy astrofızıka ınstıtýty mamandarynyń málimetinshe, 7 qyrkúıek kúni saǵat 21:26-da Aı Jerdiń jartylaı kóleńkesine ene bastady. Tolyq faza 22:29-da bastalyp, 23:53-te aıaqtalǵan. Al tutylýdyń ózi 8 qyrkúıek saǵat 00:56-da tolyq aıaqtaldy.
Aı tolyq fazada 1 saǵat 22 mınýt bolady jáne qyzǵylt túske boıalady. Astronomdar bul áser kún sáýlesiniń Jer atmosferasyna shashyraýynan týyndaıtynyn atap ótti. Qysqa tolqyndar - kók jáne jasyl - shashyrańqy, al uzyn tolqyndar - qyzyl jáne qyzǵylt sary - ári qaraı ótip, Aıdyń betine shaǵylysady. Sondyqtan ony jıi «Qandy Aı» dep ataıdy.
Qolyna teleskop, fotoapparat ustaǵan nemese jaı ǵana aýlaǵa shyqqan el turǵyndary sırek kezdesetin kórinisti jaqyndarymen bólisti. Bul bireýler úshin únsiz aspandaǵy kóriniske tamsanýǵa sebep bolsa, endi bireýler úshin dostarymen nemese balalarymen «Qandy aıdy» kórip, osy sátti este saqtaý múmkindigin syılady.
Túngi aspannan fotoreportajdy nazaryńyzǵa usynamyz.
Almatyda Aı tutylǵandaǵy kórinisti Kazinform agenttiginiń fotografy Aleksandr Pavskıı túsirip úlgerdi.
Qazaqstandyqtar Aıdyń tutylýyn baqylap otyrǵanyn jazǵan bolatynbyz.