Aıdarbek Saparov bastyrylǵan astyq sapasyn aıtty
ASTANA. KAZINFORM – 2026 jylǵy forvardtyq satyp alýdy ýaqytyly bastaý úshin ákimder sharýashylyqtardyń «Azyq-túlik korporatsııasy» aldyndaǵy mindettemelerin oryndaýyn qamtamasyz etýi qajet. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.
- Jańa astyqtyń saqtalýyn qamtamasyz etý maqsatynda ákimdiktermen birlesip elevatorlyq qýattardy bosatý jumystary júrgizilip jatyr. Respýblıka boıynsha astyq saqtaý kólemi – 30,7 mln tonna. Lıtsenzııalanǵan astyq qabyldaý kásiporyndaryna jańa astyqtan 3,1 mln tonna astyq kelip tústi. Bul ótken jyldyń kórsetkishinen 2 ese artyq. Saqtaýǵa túsken jumsaq bıdaı kóleminiń 60 paıyzy joǵarǵy synypqa, 28 paıyzy tórtinshi synypqa, 12 paıyzy besinshi synypqa jáne synypsyz bıdaıǵa jatqyzyldy, - dedi ol.
Mınıstrdiń aıtýynsha, forvardtyq satyp alý baǵdarlamasy tıimdiligin kórsetip jatyr. Ol keler eginniń kepildi ótkizilýin qamtamasyz etedi.
- 2026 jylǵy forvardtyq satyp alýdy ýaqytyly bastaý úshin ákimderden sharýashylyqtardyń «Azyq-túlik korporatsııasy» aldyndaǵy mindettemelerin oryndaýyn qamtamasyz etýdi suraımyz. Ákimdikterge qazir egin jınaýdy ýaqytynda aıaqtap, árbir qolaıly kúndi barynsha tıimdi paıdalaný mańyzdy. Sonymen qatar jańa egin astyǵyn elevatorlarda úzdiksiz qabyldap, tıisti saqtaý jaǵdaılaryn qamtamasyz etý qajettigin atap ótemin. 2026 jylǵy eginge tuqymdy toltyrýǵa erekshe nazar aýdarý kerek, - dedi ol.
Aıta keteıik, bıyl boljam boıynsha 24 mln tonna astyq bastyrylady.