Aıdarbek Qojanazarov: Otandyq óndirýshilerdi zańnamalardy ózgertý arqyly qoldaımyz

QARAǴANDY. QazAqparat – Dıqandarǵa sýbsıdııa alýda ushyrasatyn qıyndyqtar, elektr energııasynyń tarıfi, mashına jasaý salasyn bilikti mamandarmen qamtý. Qaraǵandy oblysyna jumys sapary barysynda agrarshylarmen jáne taýar óndirýshilerimen kezdesken Májilis depýtaty Aıdarbek Qojanazarov osy jáne ózge de máseleler boıynsha pikir almasty, dep habarlaıdy QazAqparat Palatanyń baspasóz qyzmetine silteme jasap.

Abaı aýdanynda depýtat dándi daqyldar men kartop, asyl tuqymdy mal ósirýge mamandandyrylǵan «Shans» sharýa qojalyǵynda boldy. 1997 jyly qurylǵan sharýashylyqta 100-den astam adam eńbek etedi. Aıdarbek Qojanazarov sharýa qojalyǵy basshysy Igor Jabıakpen sý, aldaǵy egin jınaý naýqany, azyq-túlik qaýipsizdigi máselelerin talqylady. Dıqandar sýbsıdııa alýdaǵy qıyndyqtarmen bólisti.

Qaraǵandyda ornalasqan Clobal City kóterme jáne dıstrıbıýtorlyq ortalyǵynda májilismen saýda-qoıma kesheni jumysymen tanysty. Qazaqstandaǵy eń iri keshenderdiń biri shaǵyn jáne iri bızneske qoımalyq, saýda jáne bıznes ınfraqurylymynyń tolyq qyzmetterin kórsetedi. Bul ortalyqta sharýalarmen yntymaqtastyq máseleleri, aýyl sharýashylyǵy ónimderin saqtaý jáne tasymaldaý múmkindikteri talqylandy.

Depýtat oblystaǵy eń iri energııa tasymaldaýshy uıym – «Qaraǵandy Jaryq» JShS-de de boldy. Kompanııa 250 myńǵa jýyq tutynýshyǵa qyzmet kórsetedi. Munda elektr jelilerin jańartý, úzdiksiz elektr qýatymen qamtamasyz etý, elektr energııasynyń tarıfteri máseleleri kóterildi.

Kendi qortpalardy alý jáne óńdeý, metall prokatyn shyǵarýmen aınalysatyn Qaraǵandy bolat quıý jáne mashına jasaý zaýytynyń ujymynda 800 jumysshy qyzmet etedi. Bul jerde shıkizat baǵasynyń qymbattaýy, óndiriste jumys isteý úshin bilikti kadrlar daıarlaý, óndiris qyzmetkerlerin áleýmettik qorǵaý sharalary týraly suraqtar talqylandy.

Sondaı-aq, depýtat Qaraǵandy aıaq kıim fabrıkasy, «SMK group» qurylys kompanııasy jumysymen tanysty. Onda óndiristiń ózekti máseleleri talqylandy. Fabrıka basshylyǵy atap ótkendeı, kásiporynnyń negizgi mindeti – tutynýshylardyń qaýipsizdigin 100% qamtamasyz etetin joǵary sapaly mamandandyrylǵan aıaq kıim shyǵarý.

«Parlament Májilisindegi «Respublica» partııasynyń fraktsııasy aýyl sharýashylyǵyna, shaǵyn jáne orta bızneske, áleýmettik salaǵa qatysty birqatar máseleni kóterdi. Onyń ishinde biz aýyl sharýashylyǵy ónimderin eksporttaýǵa tyıym salýdy shekteýdi, qosylǵan qun salyǵy esebin, agroónerkásip keshenindegi sýbsıdııalardy bólý júıesin qaıta qaraýdy, sýarmaly sý problemalary men organıkalyq ónimderge qoıylatyn talaptardy standarttaýdy jaqtaımyz. Otandyq ónim óndirýshilerdi qoldaýdy zańdar men erejelerdi ózgertý arqyly júrgize alamyz», - dedi Aıdarbek Qojanazarov.

Halyqpen, eńbek ujymdarymen, agrarshylar jáne ónerkásipshilermen kezdesýler depýtattarǵa jergilikti jerdegi máselelerdi jan-jaqty zerdeleýge kómektesedi. Kóterilgen problemalar Parlament Májilisiniń otyrystarynda partııa fraktsııasynyń depýtattyq saýaldaryna engizilip, olardy sheshý joldary Úkimetpen birlesip, ázirlenedi.