Aıbek Oralbaı bokstan álem chempıony atandy

ASTANA. KAZINFORM — Anglııanyń Lıverpýl qalasynda World Boxing aıasynda ótip jatqan álem chempıonatynda Aıbek Oralbaı (90 keli) altyn medal aldy.

Otandasymyz fınalda ózbekstandyq Djahongır Zokırovpen qolǵap túıistirdi. Birinshi jáne ekinshi raýndta Aıbek qarsylasyna ese jiberse, sheshýshi raýndta qarsylasyn qapy qaldyrdy.

Osylaısha Aıbek el quramasyna jetinshi altyn medaldy saldy.

Eske salsaq, budan buryn Mahmud Sabyrhan (55 keli), Sanjar Tashkenbaı (50 keli) jáne Alýa Balqybekova (51 keli), Aıda Ábikeeva (65 keli), Tórehan Sabyrhan (70 keli), Natalıa Bogdanova (70 keli) álem chempıony atansa, Nazym Qyzaıbaı (48 keli) kúmis júldeger boldy.

Dúbirli doda 4-14 qyrkúıek aralyǵynda Anglııanyń Lıverpýl qalasynda ótip jatyr. Jekpe-jekter «Qazaqstan» jáne «Qazsport» telearnalarynan tikeleı efırde kórsetildi.

Álemniń ár qıyrynan kelgen boksshylar 4-10 qyrkúıek aralyǵynda irikteý kezeńinde baq synady. Al 12-13 qyrkúıekte jartylaı fınaldyq, 13-14 qyrkúıekte fınaldyq básekeler ótti.