Aıazdy kúnderi pesh jaqqanda órtten qalaı saqtaný kerek
ShQO Tótenshe jaǵdaılar departamenti baspasóz qyzmetiniń málimetine súıensek, aıaz kúsheıgende peshten shyqqan órt jıilep, ıis tıgen adamdar kóbeıedi. Soǵan oraı pesh jaqqanda qaýipsizdik erejelerin qatań saqtaǵan jón.
Qysta úıdi jylytý úshin pesh durys, eń bastysy qaýipsiz qalanýy kerek. Jer úı ıeleriniń «taǵy bir qystap shyǵamyn» dep óziniń jáne jaqyndarynyń qaýipsizdigine nemquraıly qaraýy qaıǵyly jaǵdaılarǵa ákelip soǵyp jatady.
«Shatyrǵa da nazar aýdarǵan jón. Negizinen dál osy shatyrdan órt shyǵýynyń sebebi óte kóp. Onda turmystyq qoqys, eski zattar men kitaptar, jıhazdar saqtalady. Al munyń bárine murja jaqyn turady. Murjada jaryq bolsa kishkentaı ǵana ushqyn da qyzyl jalynnyń shyǵýyna jetkilikti», - dedi oblystyq TJD memlekettik órt baqylaý basqarmasynyń bastyǵy Nurjan Ómirjanov.
Shyǵys Qazaqstanda pesh jaǵyp otyrǵan 114 000-ge jýyq úı bar. Aldaǵy kúnderi aımaqta aýa temperatýrasy taǵy da sýytady dep kútilýde. Osy rette, qutqarýshylar turǵyndarǵa aıazdy kúnderi peshti qalaı jaǵý kerektigin túsindirdi:
- Peshti kúnine bir ret emes, birneshe ret qyzdyrǵan durys,
- Pesh esiginiń aldynda mindetti túrde ot aldyndaǵy metall tabaq bolýy tıis ,
- Peshti benzınmen, kerosınmen nemese basqa janǵysh suıyqtyqtarmen jaqpańyz. Olardy qoldanǵan kezde jarylys bolýy múmkin,
- Kúldi, shlakty, kómirdi janatyn qurylystardan 15 metr qashyqtyqta ornalasqan arnaıy jerge qoıý kerek,
- Pesh jaǵýdy uıqyǵa jatar aldynda keminde 2 saǵat buryn toqtatý kerek.
Foto: dreamstime.com
