Avtokólik eksportynda Qytaı birinshi orynǵa shyqty

ASTANA. KAZINFORM – Qytaı avtomobıl óndirýshileri qaýymdastyǵynyń málimetinshe, 2023 jyly Qytaıdyń avtomobıl eksporty tuńǵysh ret Japonııany basyp ozyp, álemde birinshi orynǵa shyqty. Bul týraly Qytaıdyń «Jenmın jıbao» aqparattyq portaly málim etti.

Qytaılyq BAQ-tyń dereginshe, 31 qańtarda Japonııanyń avtomobıl óndirýshileri qaýymdastyǵy 2023 jyly japondyq avtomobıl eksporty týraly derekterdi jarııalaǵan.

Atap aıtqanda, 2023 jyly japondyq avtomobıl eksporty 4,42 mıllıon kólikten asqan.

«Buǵan deıin Qytaı avtomobıl óndirýshileri qaýymdastyǵynyń derekteri Qytaıdyń avtokólik eksporty 2023 jyly 4,91 mıllıon dana bolǵanyn kórsetken. Bul Qytaıdyń avtokólik eksportynda alǵash ret Japonııany basyp ozyp, álemdegi eń iri avtokólik eksporttaýshy boldy degendi bildiredi», - dep jazady «Jenmın jıbao».