Avstralııada tórt balasyn óltirgeni úshin 20 jyl túrmede otyrǵan áıel ǵylymnyń arqasynda bostandyqqa shyqty
2003 jyly sot Ketlın Folbıgti qorǵaýshy taraptyń aıtqanyna senbeı, 4 balasynyń bári túgel tabıǵı sebepten qaıtys bolýy ekitalaı dep sanady.
Biraq jaqynda ǵalymdar osyny dáleldeıtin jańa zertteý jasap shyǵardy.
Alqabıler soty 10 jyl ishinde uldary Kaleb pen Patrıkti, qyzdary Sara men Laýrany óltirgeni úshin aıypty dep tanyp, úkim shyǵarǵan soń Ketlın Folbıgg «Avstralııadaǵy eń qorqynyshty kisi óltirýshi» atanǵan.
Folbıgg 1989-1999 jyldar aralyǵynda kishkentaı tórt balasy kenetten qaıtys bolǵannan keıin qamaýǵa alyndy.
Sotta prokýrorlar áıel olardy tunshyqtyryp óltirdi dep málimdedi.
Bul rette balalardyń denesinen eshqandaı býyndyrý izi nemese qandaı da bir jaraqat týraly zattaı dálel keltirilgen joq.
Aqyry Folbıgg janama dálel negizinde sottaldy: ol jeke kúndeligine ana bolý ońaı emes ekenin jáne balalardyń ólimine ózin kinálaıtynyn jazǵan.
Keıinnen Folbıgtiń qorǵaýshylary birneshe ret apellıatsııa berip, 2019 jyly istiń qaıta tergelýine bastamashy boldy, alaıda budan esh nátıje shyqpady.
Tergeý amaldaryn otstavkadaǵy sýdıa Tom Baterst júrgizgen soń istiń jańa mán-jaıy anyqtaldy.
Prokýrorlardyń kózqarasyn ózgertýge negiz bolǵan sebep - ımmýnologtar tobynyń tujyrymy boldy.
Olar júrgizgen zertteý arqyly Folbıgtiń qyzdary Sara jáne Laýradan júrektiń kenetten toqtap qalýyna ákeletin calm 2 G114R dep atalatyn jalpy genetıkalyq mýtatsııa anyqtalǵan.
Al uldary Kaleb pen Patrıkten ǵalymdar basqa genetıkalyq mýtatsııany tapty.
Zertteý tobyn basqarǵan Avstralııa ulttyq ýnıversıtetiniń professory Karola Vınýesananyń aıtýynsha, álemde osy genetıkalyq mýtatsııamen baılanysty ólimge ákele alatyn júrek aýrýyna ushyraýdyń nebári 134 oqıǵasy belgili.
Jańa Ýels gýbernatory tolyq raqymshylyq týraly jarlyqqa qol qoıyp, Folbıgti dereý túrmeden bosatýdy buıyrdy.
Avstralııa ǵylym akademııasynyń málimdemesinde bul is eldegi quqyq júıesin ǵylymdaǵy progresti eskere otyryp reformalaý qajettigin kórsetedi delingen.
