Aýyldardy ınternetpen tolyq qamtý merzimi naqtylandy
«Elimizde jalpyǵa birdeı deklaratsııalaýdy engizý kezinde keń jolaqty ınternetke qoljetimdikti qamtamasyz etý mańyzdy ekeni belgili. Qazirgi ýaqytta keń jolaqty ınternet barlyq iri qalalarda, oblys ortalyqtarynda, sondaı-aq aýdan ortalyqtary men 3 324 aýyldyq (halyq sany 250 adamnan astam) eldi mekende qamtamasyz etilgen. Bul óz kezeginde 16 mıllıonǵa jýyq adamdy keń jolaqty ınternetpen qamtýǵa múmkindik berdi, ıaǵnı halyqtyń 90 paıyzyn qurady. Árıne, ınternetpen qamtamasyz etýde aýyldyq eldi mekenderde qıyndyqtar bar. Osyny eńserý maqsatynda bizde eki joba iske asyrylýda», - dedi G. Bókeeva.
Birinshi joba – talshyqty-optıkalyq baılanys tehnologııasy boıynsha eldi mekenderdi keń jolaqty ınternetke qosý. Joba memlekettik-jekeshelik áriptestik tetigi arqyly júzege asyrylýda. Úsh jylda salynǵan talshyqty-optıkalyq jeli 20 myń shaqyrymnan asady.
2019 jyly ınternetke 494 aýyldyq eldi mekende ornalasqan 1 470 memlekettik organ men bıýjettik uıym qosyldy. 2020 jyly 769 aýyldaǵy memorgandar men bıýdjettik uıymdardy qamtý josparlanyp otyr.
G. Bókeevanyń aıtýynsha, ekinshi jobada tórtinshi býyndaǵy uıaly baılanys jelilerin salyp, aýyldarda basqa da tehnologııalardy engizýdi qarastyrýda. Bul joba 2020-2022 jyldar aralyǵynda iske asyrylady. Ol úshin qajetti radıjıilikter bólindi.
Atalǵan jobanyń nátıjesinde 880 aýyldyq eldi meken qamtamasyz etiledi. Osyndaı aýyldarda 560 myńǵa tarta adam turyp jatyr. Osy arqyly ınternetpen halyqtyń 93 paıyzy qamtylady.
Ary qaraı 2021-2022 jyldary 885 aýylǵa keń jolaqty ınternet tartylady. Bul eldi mekenderde 600 myńǵa jýyq adam bar.
«2022 jyldyń sońyna qaraı keń jolaqty ınternetpen 5 myńǵa jýyq aýyldy eldi meken qamtylady. Nátıjesinde, biz 18 mıllıonǵa jýyq adamǵa nemese halyqtyń 97 paıyzyna ınternet qoljetimdi bolady. Qalǵan úsh paıyzy spýtnıktik baılanysty paıdalanýdyń tehnıkalyq múmkindigimen qamtamasyz etiledi», - dedi departament basshysy.
