Aýyldarda jattyǵý úshin barlyq jaǵdaı jasalǵan - Jambyl oblysynan Tartyl Fest fınalısi
- Berik, ózińiz jaıly azdaǵan málimet bere ketseńiz...
- Merki aýdanynyń Merki aýlynda turamyn. Jasym 35-te, úılengenmin. Sportqa bala kezimnen áýespin ári óz betimshe aınalystym. Qazir de jattyǵýdy jalǵastyryp kelemin. Eki joǵary bilimim bar – ınejenerlik jáne sporttyq. Almatydaǵy tehnologııalyq ýnıversıtette «ınjener-tehnolog» mamandyǵy boıynsha bilim aldym. Almatyda stýdent bolyp júrgenimde 4 jyl boıy kúrespen aınalystym. Biraq, ınjenerlik bilimim jetkiliksiz bolǵannan keıin Taraz memlekettik ýnıversıtetin «dene tárbıesi jáne sport» mamandyǵy boıynsha bitirdim.
Sport janyma jaqyn eken. Qazirgi ýaqytta osy ekinshi mamandyǵym boıynsha eńbek etip, aýdan ortalyǵy Merki aýylyndaǵy №5 mektepte dene shynyqtyrýdan sabaq beremin. Balalarǵa qazaqtyń ulttyq oıyny toǵyzqumalaqty úıretemin.
- Sportqa áýestenýińizge ne túrtki boldy?
- Túsindirý qıyn. Eshkim májbúrlegen joq, óz erkimmen aınalystym. Tálimgerim, jattyqtyrýshym bolǵan emes. Dostarymyzben birge ózimiz aınalysaıyq dep sheshtik. Bul jaı ǵana sportqa qumarlyq ta shyǵar. Sportpen mektebimizdiń sport zalynda kúnara aınalysyp turamyn. Shtanga kóterip, týrnıkke tartylyp, tennıs oınaımyz, ózge de sport túrlerimen aınalysamyz. Osydan eki jyl buryn Merkide ótken aýdandyq jarystarda sporttyń ár túrinen jeńimpaz atanyp, syılyqqa, medalge ıe bolǵan edim. Osy jaıt sportpen odan ary aınalysa berýime túrtki bolǵan sııaqty. Sport túrleriniń ishinde týrnıkke tartylý qatty unaıdy.
Aıta keterligi, Tarazda ótken oblystyq jarysqa Merkiden qurama komanda bolyp baryp, týrnık, shtanga syndy sport túrlerinen saıysqa tústik. Nátıjemiz jaman emes.
- Ótken jyly Tarazda ótken týrnıkke tartylý jarysynan alǵan áserińizben bólisseńiz...
- Tarazdaǵy Tartyl Fest týrnırine qatysty aıtar bolsam, oǵan qatysýǵa nıet tanytqandar óte kóp boldy. 472 qatysýshy tirkeldi. Biraq, nıet tanytqandardyń qatary odan da kóp edi. Osy oblystyq týrnırde men 30 ret tartylyp, jeńiske jettim.
- Qazaqstanda Tartyl Fest týrnıkke tartylý festıvali ótetindigin qaıdan bildińiz?
- Tartyl Fest jaıynda Instagram-nan kezdeısoq bildim. Buǵan deıin onyń uıymdastyrýshysy Aıtym Jaqypov jaıynda da, jalpy mundaı jarys týraly da bilmegen edik. Osydan keıin bul jarysqa qatysamyn ári mindetti túrde jeńiske jetemin dep, aldyma maqsat qoıdym. Kún saıyn jattyǵyp, barymdy saldym.
Tarazǵa kórshiles Rysqulov aýdanyndaǵy tanysymmen birge bardym. Ol ekinshi oryn, al men birinshi oryn aldym. Endi ekeýmiz kún saıyn tynymsyz jattyǵyp júrmiz.
Qazirgi ýaqyttaǵy basty maqsatym – aldaǵy grand-fınalda jeńiske jetý. Árıne, bul óte qıyn bolady ári jaýapty is. Óıtkeni, ol jerge Qazaqstannyń eń myqty jigitteri jınalady.
- Salaýatty ómir saltyn ustanasyz ba?
- Árıne, naǵyz sportty zııandy ádettermen aralastyrýǵa bolmaıdy. Shylym shekpeımiz, ishimdik ishpeımiz. Salaýatty ómir saltyn ustanamyz. Tek, jumys - úı - jattyǵý. Ár kúnimiz solaı ótedi.
Búginde aýylymyzda kóptegen turǵyn sportqa bet buryp, jaman ádetterinen arylyp kele jatyr. Dostarym da salaýatty ómir saltyn ustanady, kópshiligi sportpen aınalysady. Qazirgi ýaqytta aýyldyq jerde sportpen aınalysýǵa múmkindik bar. Emin-erin jattyǵýǵa bolatyn sport zaldary salynǵan.
Menińshe, «Tartyl Fest» syndy sporttyq is-sharalar jastarymyzdy salaýatty ómir saltyn ustanýǵa, sportpen aınalysýǵa, ózderin damytýǵa, ómirlerin durys qurýǵa óte jaqsy yntalandyra alady.
- Otbasyńyz qoldaý bildire me?
- Iá, ata-anam, jubaıym jáne eki qyzymmen tatý-tátti ómir súrip jatyrmyz. Úlken qyzym 7 jasta, birinshi synypta oqıdy. Kishi qyzym jaqynda 5 jasqa tolady. Qyzdarym óte qaǵilez, menimen birge jattyǵý jasaıdy. Aldaǵy ýaqytta olardy qandaı da bir sport túrine baýlımyn dep oılaımyn. Eger júlde utyp alsam, onda eń aldymen ákem men sheshemdi quttyqtaıtyndyǵym sózsiz. Al, odan keıin múmkindiginshe hanshaıymdaryma páter alýǵa jumsaımyn.
- Áńgimeńizge rahmet! Sporttyq jetistikter men jeńis tileımiz!
Ótken jyldyń shildesinde Taraz týrnıkke tartylýdan sporttyq festıvaldi qabyl alǵan tórtinshi oblys ortalyǵy bolǵan edi. Kúshi men eptiligin synap kórýge bel býǵan ártúrli jas sanatyndaǵy jambyldyqtar týrnır kórigin qyzdyrdy. Jambyldyqtar arasynda 8 jastaǵy Arnur Sultanhan týrnırdiń eń jas qatysýshysy atanyp, arnaýly syılyqqa ıe boldy. Ol týrnıkke 15 ret tartyldy. Sonymen qatar, dál osyndaı syılyq týrnırdiń eń jasy úlken qatysýshysy bolǵan 60 jastaǵy Oralbek Aqylbekke tabystaldy.
Tartyl Fest saıysyna qatysýshylar salmaǵy men jasyna qaraı 9 sanat boıynsha baq synady. Festıvalge qatysýshy barlyq 20 qala úshin de ereje birdeı – durys ári barynsha kóp tartylý.
18 aqpanda Astanada Tartyl Fest týrnıkke tartylýdan respýblıkalyq týrnıriniń grand-fınaly ótedi. Grand-fınalǵa óńirlik irikteý jarystary kezinde eń úzdik nátıje kórsetken 170 sportshy qatysady. Qatysýshylardyń jasy 14 pen 51 jas aralyǵynda.
Foto: Berik Aıdabosynovtyń jeke muraǵatynan
