Aýyl turǵyny astanalyqtardy júrgizýshi kýáligin alyp beremin dep aldaǵan
«Aqmola oblysynyń turǵyny áleýmettik jelilerde emtıhan tapsyrmaı júrgizýshi kýáligin alýǵa kómek usynyp, habarlandyrýlar ornalastyrǵan. Ol ózin mamandandyrylǵan Halyqqa qyzmet kórsetý ortalyǵynyń qyzmetkeri retinde tanystyrǵan. Búgingi kúni polıtsııaǵa aldanǵan 8 azamat júgindi, zardap shekkenderden ótinishter kelip túsýde», - dedi Astana qalalyq Polıtsııa departamentiniń baspasóz qyzmetinen.
Jedel-izdestirý is-sharalary barysynda «Baıqońyr» aýdanynyń polıtsııa qyzmetkerleri alaıaqtyqqa qatysy bar degen kúdikpen 22 jastaǵy aýyl turǵynyn ustaǵan. Ol óziniń kómegi úshin 80-160 myń teńge aralyǵynda aqsha alǵan.
Atalǵan alaıaqqa aldanǵan elorda turǵyny ótken jyldyń maýsym aıynda 120 myń teńgesin berip qoıǵan. Áıel aqshany da, qujattardy da almaǵannan keıin polıtsııaǵa júgingen.
«Qazirgi ýaqytta QR Qylmystyq kodeksiniń 190-baby 2-bóligi (alaıaqtyq) boıynsha tergeý amaldary júrgizilip jatyr.
Júrgizýshi kýálikterin daıyndaý tártibi men erejeleri www.gov.kz resmı ınternet-resýrsynda ornalastyrylǵan. Júrgizýshi kýáligin jasaý týraly jeke tulǵalardyń usynystary, sondaı-aq messendjerler men áleýmettik jelilerdegi habarlandyrýlar alaıaqtyq bolyp tabylady. Jalǵan qujattardy satyp alǵany úshin QR zańnamasyna sáıkes jaýapkershilik qarastyrylǵan», - delingen polıtsııa habarlamasynda.
