Aýyl sharýashylyǵynda jas ǵalymdarǵa granttyq qarjylandyrý engiziledi

NUR-SULTAN. QazAqparat – 2022 jyldan Agroónerkásiptik keshendegi ahýaldyq taldaý ortalyǵy óz jumysyn bastaıdy. Bul týraly Senattaǵy parlamenttik tyńdaýda Aýyl sharýashylyǵy mınıstri Erbol Qarashókeev málim etti, dep habarlaıdy QazAqparat tilshisi.

«Agrarlyq ǵylym júıesinde ǵylymı ázirlemelerdi óndiriske engizý jáne olardy kommertsııalandyrý, damyǵan elderdiń tájirıbesi boıynsha bilim taratýdyń zamanaýı ulttyq júıesin qurý problemalaryn sheshý jumystary júrgizile bastady. Sondaı-aq, bilim berý baǵdarlamalaryn jańartý, oqytýdyń praktıkalyq baǵytyn kúsheıtý esebinen kadrlar daıarlaý sapasyn arttyrýǵa basa nazar aýdarylýda. Bıyl agrarlyq ǵylymdy 2021-2023 jyldarǵa baǵdarlamalyq-nysanaly qarjylandyrý jyl saıyn 8,5 mlrd teńgege deıin jetkizildi (salystyrý úshin 2015-2017 jyldary jyl saıyn 4,5 mlrd. teńgeden bólindi)», - dedi E. Qarashókeev «Aýyl sharýashylyǵyn damytýdyń ózekti máseleleri men perspektıvalary» taqyrybyna arnalǵan parlamenttik tyńdaýda.

Onyń aıtýynsha, kelesi jyldyń basynan bastap mınıstrliktiń taldaý jumysyn kúsheıtý maqsatynda Agroónerkásiptik keshendegi ahýaldyq taldaý ortalyǵy óz jumysyn bastaıdy.

«Sonymen qatar, jas ǵalymdarǵa salalyq granttyq qarjylandyrý engiziledi», - dedi mınıstr.

Budan buryn habarlanǵandaı, Erbol Qarashókeev saladaǵy negizgi problemalardy aıtty.

Salany memlekettik qoldaý máselelerinde de eleýli kemshilikter bar. Eń aldymen, bul sýbsıdııalaý tetikteriniń kúrdeliligi, sýbsıdııa alýdyń sharttarynyń kóptigi.