Aýyl sharýashylyǵy salasynda qandaı mamandyqtar joıylady – zertteý
2020 jylǵy úshinshi toqsandaǵy kórsetkishke sáıkes, Qazaqstanda aýyl sharýashylyǵy salasynda 1,2 mln adam eńbek etedi. Bul kórsetkish – elde jumyspen qamtylǵan azamattardyń 13,9 paıyzy.
«2020 jyldyń 10 aıynda aýyl sharýashylyǵy sektorynda eńbektiń elektrondy bırjasynda 50 myń vakansııa jarııalandy. Olardyń ishindegi 40 paıyzyna biliktilik talaby qoıylǵan. 2020 jyly eń qajetti mamandyqtar qatarynda traktorshy, aýyl sharýashylyǵy mehanızatsııasy salasyndaǵy ınjener, kúzetshi, krandar men kótergishterdiń operatory, jeke kóliktiń júrgizýshisi men shopyry boldy», - delingen zertteýde.
Tsıfrlyq tehnologııalar kúnnen kúnge damyp, protsesterdiń bári de avtomattandyrylyp kele jatqan zamanda jahandyq eńbek naryǵyna edáýir ózgerister engizilip jatyr. Osynyń nátıjesinde bolashaqta suranysqa ıe bolatyn mamandyqtar paıda bolady. Al qol eńbeginiń kóbi avtomattandyrylady.
Álemdik tendentsııa aýyl sharýashylyǵyn da aınalyp ótken joq. Zertteýge sáıkes, jańadan paıda bolatyn 10 jáne joıylatyn 18 mamandyq aıqyndalǵan.
«Jańa mamandyqtar qatarynda sút fermalaryndaǵy robottehnık malshy, jer jáne sý resýrstaryn basqaratyn IT ınjener, agronom ekonomıst, tsıfrly agronom, aýyl sharýashylyǵy salasyndaǵy jańa tehnologııalar boıynsha maman jáne taǵy basqalaryn jatqyzýǵa bolady. Al 2025 jylǵa qaraı mynadaı mamandyqtar joıylady: tańbalaýshy (olardyń ornyna lazermen tańbalaıtyn qurylǵylar keeldi), qaptaýshy jáne bólshektep ólsheýshi (bir ǵana robot qaptaýshy birneshe adamnyń jumysyn atqara alady, sonymen qatar robot táýlik boıy jumys isteýge qaýqarly), suryptaýshy nemese irikteýshi (robottalǵan júıeler ónimdi sapasy men basqa da belgilerine sáıkes suryptaı alady), júk tasýshy (qazirdiń ózinde robottalǵan kótergishter jumys istep jatyr)», - delingen zertteýde.
