Aýyl kásipkerlerin jappaı oqytý júıesin qurý qajet - agrarlyq sala mamany
«Memleket basshysy Nursultan Nazarbaevtyń qazan aıyndaǵy Joldaýy elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnaldy.
Onda agroónerkásip kesheniniń áleýetin tolyq iske asyrý kerektigi aıtylǵan. Negizgi mindet - eńbek ónimdiligin jáne qaıta óńdelgen aýylsharýashylyq óniminiń eksportyn 2022 jylǵa qaraı 2,5 esege arttyrý. Memlekettik qoldaýdyń barlyq sharalaryn elimizge zamanaýı agrotehnologııalardy aýqymdy túrde tartýǵa baǵyttaý qajet. Biz ıkemdi ári yńǵaıly standarttardy engizý jáne aýyl sharýashylyǵy salasyndaǵy bedeldi sheteldik mamandardy - «aqyldy adamdardy» tartý arqyly salany basqarýdyń úzdik tájirıbesin paıdalanýymyz kerek. Aýyl kásipkerlerine sharýashylyq júrgizýdiń jańa daǵdylaryn úıretý úshin jappaı oqytý júıesin qalyptastyrǵan jón», - deıdi Aldabergen Qııas.
Sonymen qatar onyń aıtýynsha, Joldaýda Úkimetke aldaǵy 3 jyl ishinde osy maqsattarǵa jyl saıyn qosymsha keminde 100 mıllıard teńge qarastyrý tapsyryldy. Aldaǵy 5 jylda bilim, ǵylym, densaýlyq saqtaý salalaryna barlyq kózderden jumsalatyn qarajatty ishki jalpy ónimniń 10 paıyzyna deıin jetkizý qajettigi atap ótildi.
«Elbasy Joldaýdy jarııalap otyrǵan sátte aýyldyń jaǵdaıyn bir kisideı biletinin, óıtkeni ózi de aýylda týyp-óskenin rııasyz kóńilmen, tipti maqtanysh sezimmen aıtqany barsha aýyl turǵyndarynyń rızashylyq sezimin týǵyzdy dep esepteımin. Budan aýylǵa degen qamqorlyq pen qoldaý udaıy, úzdiksiz bola beretinin, aýyl máselesi eshqashan tasada qalmaıtynyn túsinýge bolady.Sonymen osy strategııalyq qujat elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan. A.I. Baraev atyndaǵy astyq sharýashylyǵy ǵylymı-óndiristik ortalyǵyndaǵy ǵalymdar ujymy Memleket basshysynyń halyqqa arnalǵan Joldaýyn biraýyzdan qoldaıdy jáne bul der kezinde jarııalanǵan qujat bolyp tabylady», - dep túıindedi sózin Aldabergen Qııas.
Aıta keteıik, A.I. Baraev atyndaǵy astyq sharýashylyǵy ǵylymı-óndiristik ortalyǵy QR Prezıdentiniń 2018 jylǵy 10 qańtardaǵy aldaǵy bes jylda AÓK-degi eńbek ónimdiligin keminde 2,5 ese arttyrý tapsyrmasyn oryndady.
QR Aýyl sharýashylyǵy mınıstrliginiń qoldaýy nátıjesinde «Ortalyq bazasynda naqty eginshiliktiń eksperımentaldy-tehnologııalyq platformasyn qurý» jobasyn iske asyrý maqsatynda aýyl sharýashylyǵy tehnıkasy men jabdyqtaryn (egis keshenderi, kombaındar jáne t.b.) satyp alýǵa jarǵylyq kapıtal 1046,8 mıllıon teńgege ulǵaıtyldy.
Osyǵan baılanysty 2018-2020 jyldarǵa arnalǵan baǵdarlamalyq-nysanaly qarjylandyrý sheńberinde 5 ǵylymı joba daıyndaldy. Jalpy qarjylandyrý somasy 774,0 mıllıon teńgeni quraıtyn úsh joba maquldandy. Al 2017 jyly ǵylymı jobalardy qarjylandyrý 250 mıllıon teńgeni quraǵan.
«A.I.Baraev atyndaǵy AShǴÓO» JShS bazasynda «naqty eginshilik» elementterin paıdalana otyryp, pılottyq joba ázirlendi jáne Aqmola oblysynda 3 myń gektar alańda naqty eginshilik polıgony quryldy. Onda mıneraldyq tyńaıtqyshtar men ósimdikterdi qorǵaý quraldaryn saralap engizýdiń tehnologııalyq jańalyǵy qarastyrylǵan. Sonyń arqasynda qarjy kólemi 20-dan 40 paıyzǵa deıin únemdeledi.
Ortalyq ǵylymı qyzmetten basqa, aýyl sharýashylyǵy daqyldarynyń biregeı tuqymdaryn óndirýmen de aınalysady. 2017 jylmen salystyrǵanda jazdyq bıdaıdyń ónimdiligi 2,5 esege artty jáne aǵymdaǵy jyly shamamen gektarynan 25,5 tsentner quraıdy.
Elbasy 5 qazanda jarııalaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýynda elimizdegi aýyl sharýashylyǵy mamandaryn jańa tehnologııalar boıynsha jappaı oqytý kerektigin atap ótti.
Sondaı-aq aýyldyq jerlerdiń áleýmettik ortasyn jańǵyrtýǵa qatysty aıta kele, «Aýyl - el besigi» atty jobany júzege asyrýdy usyndy.
Al aldaǵy bes jylda bilimge, ǵylymǵa jáne densaýlyq saqtaýǵa arnalǵan shyǵystar barlyq kózderden eldiń jalpy ishki óniminiń 10 paıyzyna deıin jetkiziletin bolady.
