Aýyl ákimderin tikeleı saılaý jergilikti ózin ózi basqarý ınstıtýtyn damytýdyń zańdy qadamy – Zarema Sháýkenova
Mundaı pikirdi QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Zarema Sháýkenova bildirdi, dep habarlaıdy QazAqparat tilshisi.
«Aýyl ákimderin tikeleı saılaý Qazaqstandaǵy jergilikti ózin ózi basqarý ınstıtýtyn damytý jolyndaǵy zańdy qadam sanalady. Jergilikti ózin ózi basqarý bıýdjetiniń kiris bóligin arttyrý úshin Ulttyq ekonomıka mınıstrligi ázirlegen túzetýlerge sáıkes, bıýdjettiń 4-deńgeıine salyqtar men tólemderdiń 4 túrin qosymsha berý kózdelgen. Olar: biryńǵaı jer salyǵy, ýchaskelerdi jalǵa alý, paıdalaný nemese satý tólemderi. Osylaısha, aýyl ákimderi tek qana basqarýshylyq emes, sonymen qatar jergilikti bıýdjetti bólýdegi jekelegen máselelerde qarjylyq derbestik alady», - dedi Zarema Sháýkenova.
Onyń atap ótýinshe, bul óz kezeginde ákimderdiń aýyldardaǵy sýmen jabdyqtaý, joldardy kútip ustaý, abattandyrý syndy ómirlik mańyzdy bar birqatar máseleni sheshýdegi qyzmetiniń tıimdiligin arttyratyn bolady. Buǵan qosa, saılanǵan ákimderdiń saılaýshylar aldyndaǵy jaýapkershiligi artyp, aýyl turmysyn jaqsartýǵa degen yntasyn arttyrady.
«Qazaqstandyqtar, ásirese aýyldyq jerlerdiń turǵyndary ózderiniń saılaý quqyqtaryn belsendi paıdalanyp, daýys berý kúninde saılaý ýchaskelerine belsendi keledi dep oılaımyn. Sonymen qatar kandıdattarmen, olardyń saılaý shtabtarymen kezdesýlerge belsendi qatysyp, túrli aktsııalarǵa, is-sharalarǵa aralasyp, buqaralyq aqparat quraldarynda, áleýmettik jelilerdegi jańalyqtardy tyńǵylyqty qadaǵalap otyratyn bolady. Saılaýdy baıqaý ınstıtýtyn damytýǵa da bólek toqtalyp ótken jón. Saıası partııalardyń baıqaýshylary, saılaýǵa túsetin kandıdattar men qoǵamdyq uıymdar saılaýdyń ashyqtyǵy men zańdylyǵyn qamtamasyz etedi. Munan bólek, qazirgi ýaqytta elimizdiń óńirlerinde aýmaqtyq jáne ýchaskelik saılaý komıssııalarynyń músheleri úshin semınarlar men trenıngter ótip jatyr. Komıssııa múshelerin oqytý kýrstaryn ótkizý saılaýdy uıymdastyrýǵa jumyldyrylǵan tulǵalardyń quziretin arttyrýǵa múmkindik beredi jáne aýyl ákimderi saılaýyn ádil ótkizýdiń joǵary deńgeıin qamtamasyz etedi», - dedi ınstıtýt dırektory.