Aýyl ákimderin saılaý: Qaraǵandy oblysynda úgit naýqany qalaı ótýde

QARǴANDY. QazAqparat – Qaraǵandy oblysynda aýyl ákimdigine 268 kandıdat saılaý aldyndaǵy úgitti júrgizýge kirisedi. Úgit-nasıhat naýqany 15 shildede bastaldy, dep habarlaıdy QazAqparat tilshisi.

Saılaýshylarmen kezdesýler epıdemıologııalyq talaptardy saqtaı otyryp ótýi tıis.

«Oblysta 75 okrýg boıynsha 268 kandıdat tirkelgen: 81 – saıası partııalardan jáne 187 ózin-ózi usynýshylardan. Búginnen bastap olar úgit-nasıhat jumystaryn bastaıdy. Barlyq kandıdattarǵa teń jaǵdaı jasalǵan. Saılaýshylarmen kezdesý oryndary men úgit materıaldaryn ornalastyrý oryndary anyqtaldy. Kandıdat óziniń úgit-nasıhatyn qalaı júrgizý kerektigin ózi sheshedi. Saılaýshylarmen jeke kezdesý nemese senim bildirilgen adamdar arqyly – bul árkimniń jeke quqyǵy», – dedi oblystyq saılaý komıssııasynyń hatshysy Natalıa Batalova.

Kandıdattardyń árqaısysyna respýblıkalyq bıýdjetten 220 myń teńgeden bólingen. Bul aqshany olar BAQ-ta sóz sóıleýge, úgit materıaldaryn shyǵarýǵa, kólik shyǵyndaryna jáne úı-jaılardy jalǵa alýǵa paıdalana alady.

Barlyq saılaý ýchaskeleri daıyndalyp, qajetti zattarmen tolyq qamtamasyz etilgen. Múmkindigi shekteýli jandar ózderiniń saılaý quqyǵyn júzege asyra alýy úshin barlyq jaǵdaı jasalǵan.

Saılaýshylar saılaýdyń ótetin orny men ýaqyty týraly habarlama alady.

Qaraǵandy oblysynda aýyl ákimderiniń alǵashqy tikeleı saılaýy básekelestik negizde ótedi. Orta eseppen bir orynǵa 3,5 adam úmitker bolyp otyr. Kandıdattardy bes partııa usyndy – NurOtan, «Aýyl», «Aq Jol», ADAL, QHP. Úmitkerler arasynda jeti ult ókilderi bar, erler – 226, áıelder – 42. Ortasha jasy 40 jastan asady.