Autism Talks: Astanada erekshe balalardyń ata-analary bas qosady
ASTANA. KAZINFORM — Aýtızmdi «danagóılikpen» baılanystyrý — shyndyqqa saı kelmeıtin, artyq romantızatsııa. Mamandar bul kózqaras qoǵamda qate túsinik qalyptastyratynyn aıtty.
— Neıroártúrlilik — mentaldy turǵyda adamdardyń ártúrliligi. Qoǵamǵa beıimdelýi desek bolady. Al aýtızmi bar adamdardyń áleýmettenýi, beıimdelýi qıyn. Qoǵam osyny qabyldaýy qajet. «Aýtızmge shaldyqqan balalar ǵalym bolady» dep jıi aıtady. Dertti bulaı romantızatsııalamaý kerek, — dedi áleýmettik jáne ınklıýzıvti baǵdarlamalar jetekshisi Samal Álbilbekova Jibek Joly telearnasynyń «Búgin Live» baǵdarlamasynda.
Mamandardyń aıtýynsha, aýtızm belgilerin erte kezeńde baıqaý jáne der kezinde áreket etý mańyzdy.
— Dertke shaldyqqan balalar kóbine kózge tike qaramaıdy, shaqyrǵanda kelmeıdi, gıperaktıvti bolady. Óz betinshe oınaı beredi. Qıyndyq bastalǵan tustan bastap ata-analar mán berýi kerek. Elimizde psıhologııalyq-pedagogıkalyq medıtsınalyq keńes jumys isteıdi. Respýblıka boıynsha 10 mekeme bar. Onda psıholog, nevropatolog, defektolog, sýrdopedagogtar bar. Osy mamandar dıagnozdy erte anyqtaýǵa kómektesedi, — dedi defektolog, sýrdopedagog Roza Úrstembaeva.
Sarapshylar qazirgi tańda aýtızmdi zertteý men dıagnostıkalaý baǵyttary qarqyndy damyp kele jatqanyn aıtady. Minez-qulyqty túzetý terapııasy, sensorlyq ıntegratsııa ádisteri qoldanylyp, keshendi qoldaý qalyptasyp keledi. Sonymen qatar elimizde ata-analarǵa baǵyt-baǵdar beretin túrli bastamalar da júzege asyrylýda.
— Autism Talks sharasynda ata-analar tájirıbesimen bólisip, usynystaryn ortaǵa salady. Eń bastysy, psıhologııalyq qoldaýdyń mańyzy aıtylady. 4 jylda basqosýǵa 1500 ata-ana kelip, oı bólisken, tájirıbeli arnaıy mamandar da qatysqan. Nátıje bar. 4 sáýir kúni kezekti shara taǵy ótedi, — dedi Samal Álbilbekova.
Aıta keteıik, Astanada aýtızmmen aýyratyn 2000-daı bala bar.