Aýstrııa AQSh-qa áskerı ushaqtaryn ushyrýǵa tyıym saldy

ASTANA. KAZINFORM – Aýstrııa AQSh-tyń Iranǵa qarsy operatsııaǵa qatysatyn ushaqtary úshin áýe keńistigin paıdalaný týraly ótinishin qabyldamady. Bul týraly 2 sáýir, beısenbi kúni eldiń Qorǵanys mınıstrliginiń ókili Mıhael Baýer málim etti, dep habarlaıdy Euronews.

– Ótinish jasaldy, biraq olar áý bastan qabyldanbady, - dep túsindirdi Mıhael Baýer Venanyń bul turǵyda belsendi áskerı qaqtyǵystarǵa qatysy bar elderdi qoldamaıtynyn túsindirip.

Aýstrııa 1955 jyldan beri beıtarap el, ony soltústiginde, ońtústiginde jáne shyǵysynda NATO músheleri, al batysynda beıtarap Shveıtsarııa qorshap tur.

Shveıtsarııa sonymen qatar AQSh áskerı kúshterine áýe keńistigin paıdalanýǵa tyıym saldy. Basqa eýropalyq elder buǵan deıin AQSh-tyń óz áýe keńistigin paıdalanýyna tyıym salǵan nemese shektegen. Mysaly, Ispanııa barlyq AQSh áskerı ushaǵyna áýe keńistigi men áskerı bazalaryn paıdalanýǵa tyıym salyp, buryn engizilgen shekteýlerdi keńeıtti.

– Ispanııa qaqtyǵysty ýshyqtyratyn eshteńe istemeýi kerek, - dedi ol Madrıdtiń sheshimi soǵysqa qarsy ıspandyqtardyń «kópshiliginiń kóńil-kúıin» kórsetetinin jáne BUU qaǵıdattaryna sáıkes keletinin atap ótip.

AQSh-tyń eýropalyq NATO odaqtastary da Tramp aıtqan Ormýz buǵazyn áskerı jolmen ashýǵa qatysýdan bas tartty. Osyǵan baılanysty AQSh prezıdenti Donald Tramp NATO-dan shyǵamyz dep qorqytyp, «bul áreketsizdikti áli eskeremin» dep ýáde berdi.

Buǵan deıin Donald Tramptyń Iranǵa 15 tarmaqtan turatyn beıbit jospar usynǵanyn habarlaǵan edik.