Aýstralııada jasóspirimderdiń áleýmettik jelilerdegi 5 mln akkaýnty óshirildi
ASTANA. KAZINFORM — 16 jasqa deıingi paıdalanýshylarǵa áleýmettik jelilerdi qoldanýǵa tyıym salý kúshine engennen keıin nebári bir aı ishinde platformalar aýstralııalyq jasóspirimderge tıesili shamamen bes mıllıon akkaýntty buǵattaǵan. Bul týraly AZERTADJ jazdy.
Bundaı derekterdi Aýstralııanyń ınternetti retteýshi organy eSafety usynǵan. Keıbir platformalar bul shekteýge qatysty akkaýnttardy sońǵy merzimge deıin birneshe apta buryn-aq jaba bastaıtynyn málimdegen.
Úkimettiń talaptardyń oryndalýyna qatysty alǵashqy derekteri platformalardyń zańdy oryndaý úshin aıtarlyqtaı qadamdar jasap jatqanyn kórsetedi. Atalǵan zań talaptary saqtalmaǵan jaǵdaıda 49,5 mln aýstralııalyq dollar (shamamen 33 mln AQSh dollary) kóleminde aıyppul salýdy kózdeıdi, alaıda jaýapkershilik balalarǵa nemese olardyń ata-analaryna júktelmeıdi.
Meta kompanııasy Instagram, Facebook jáne Threads platformalarynan 550 myńǵa jýyq kámeletke tolmaǵan paıdalanýshynyń akkaýntyn óshirgenin habarlady. Paıdalanýshylardyń eń tómengi jasyna qatysty talaptar YouTube, TikTok, Google-ǵa tıesili Snapchat jáne X jelilerine de qoldanylady.
Elektrondyq qaýipsizdik jónindegi komıssar Djýlı Inman Granttyń aıtýynsha, keıbir kámeletke tolmaǵandardyń akkaýnttary áli de belsendi qalyp otyr, sondyqtan tyıymnyń tolyq saqtalýy týraly aıtýǵa áli erte. Degenmen, bastapqyda tyıymǵa ilikken barlyq kompanııa ony saqtaıtynyn málimdegen.
Psıhıkalyq densaýlyq salasyndaǵy mamandardyń qatysýymen júrgiziletin zertteý bul tyıymnyń uzaq merzimdi saldaryn birneshe jyl boıy baqylaýdy kózdeıdi.
Budan buryn habarlanǵandaı, Aýstralııa jasóspirimderdiń áleýmettik jelini qoldanýyna alǵashqy bolyp tyıym saldy.