Australian Open: ıÝlııa Pýtıntseva alǵash ret tórtinshi aınalymǵa ótti

ASTANA. KAZINFORM — Qazaqstannyń ekinshi, álemniń 94-raketkasy ıÝlııa Pýtıntseva Aýstralııa ashyq chempıonatynyń tórtinshi aınalymyna shyqty.

Qazaqstandyq tennısshi úshinshi aınalymda dúnıejúzilik reıtıngide 112-orynda turǵan túrkııalyq, 23 jastaǵy Zeınep Sonmezben synǵa tústi.

Z.Sonmez osy dodada sensatsııa jasap, «Úlken dýlyǵa» týrnırinde óz qarsylasyn jeńgen alǵashqy túrkııalyq tennısshi atanǵan bolatyn. Al 31 jastaǵy qazaqstandyq sportshy áldeqaıda tájirıbeli edi. Biraq ol osyǵan deıin Aýstralııa ashyq chempıonatynda úshinshi aınalymnan asyp kórmegen-di.

Jankúıerlerdiń kópshiligi túrkııalyq tennısshini qoldap otyrdy. 

Birinshi partııada ıÝ.Pýtıntseva 5:2 esebimen alǵa ketip, degenine jetti — 6:3.

ıÝlııa ekinshi setti breıkpen bastady — 2:0. Degenmen Zeınep tarazy basyn teńestire aldy — 3:3. Esep 5:5 bolǵanda, Pýtıntseva breık jasap, matchqa dop bergenimen, sol múmkindigin múlt jiberdi. Taı-breıkte Sonmez sátti oınady — 7:6 (7:3).

Úshinshi, sheshýshi partııada Pýtıntseva 3:0 esebimen alǵa ketkenimen, Sonmez esepti qysqarta aldy. Biraq qazaqstandyq tennısshi qaıyra breık jasady — 5:3. Bul joly ol matchty jeńispen túıindeı aldy — 6:3.

Eki saǵat 36 mınýtqa sozylǵan tartysty básekede ıÝ.Pýtıntseva 2 eıspen birge 13 breık-poınttyń altaýyn paıdaǵa asyrdy. Sonmez 1 eıs, 4 breıkpen (13 breık-poınt) shekteldi.

ıÝlııa Pýtıntseva shırek fınalǵa shyǵý úshin álemniń 8-raketkasy, ıtalııalyq Jasmın Paolını nemese reıtıngide 27-satydaǵy amerıkalyq, 18 jastaǵy Iva Iovıchtiń qaı jeńgenimen talasady. 

Eske sala keteıik, budan buryn Aýstralııa ashyq chempıonatynda Elena Rybakınanyń ekinshi jeńisine qol jetkizgenin jazǵan edik.