Australian Open: Rybakına álemniń 2-raketkasyn utyp, jartylaı fınalǵa ótti

ASTANA. KAZINFORM – Qazaqstannyń birinshi, álemniń 5-raketkasy Elena Rybakına Aýstralııa ashyq chempıonatynyń jartylaı fınalyna shyqty.

Qazaqstandyq tennısshi shırek fınalda álemniń 2-raketkasy, Polsha ókili Iga Shventekke tap keldi.

Azýly qarsylastar osyǵan deıin ózara 11 ret kezdesip, sonyń altaýynda Shventek jeńgen edi.

Bul joly tennısshiler oıyndy breık almasýmen bastady. Degenmen esep 6:5 bolǵan mezette Rybakına breık jasaı bildi – 7:5.

Ekinshi sette Elena birden alǵa ketti – 2:0. Sodan keıin bet qaratpaı, matchty eıspen túıindedi – 6:1.

Bir saǵat 35 mınýtqa sozylǵan básekede Rybakına 11 eıspen birge 7 breık-poınttyń tórteýin óz esebine jazdy. Shventek 3 eıs, 1 breıkpen (4 breık-poınt) shekteldi.

Osylaısha, qazaqstandyq tennısshi sporttyq jolynda ekinshi ret Aýstralııa ashyq chempıonatynyń jartylaı fınalyna joldama aldy.

Elena Rybakına fınalǵa shyǵý úshin amerıkalyqtar, álemniń 4-raketkasy Amanda Anısımova nemese reıtıngide 6-oryndaǵy Djessıka Pegýlanyń jeńgenimen talasady.

Eske sala keteıik, budan buryn Aýstralııa ashyq chempıonatynda Elena Rybakına álemniń ekinshi raketkasyn jeńe ala ma, sony jazǵan edik.