Australian Open: Aleksandr Býblık úshinshi aınalymǵa shyqty

ASTANA. KAZINFORM – Qazaqstannyń birinshi, álemniń 10-raketkasy Aleksandr Býblık Aýstralııa ashyq chempıonatynyń úshinshi aınalymyna joldama aldy.

Qazaqstandyq tennısshi ekinshi aınalymda álemniń 54-raketkasy, majarstandyq, 33 jastaǵy Marton Fýchovıchpen sheberlik baıqasty.

Tartysty órbigen birinshi sette esep 5:5 bolǵan mezette Býblık breık jasap, sosyn óz geımin ala bildi – 7:5.

Ekinshi partııa barysynda tennısshiler breık almasty. Degenmen esep 4:4 bolǵanda, qazaqstandyq sportshy taǵy bir breıkke qol jetkizdi – 6:4.

Úshinshi sette Fýchovıch 4:2 esebimen alǵa ketti. Biraq esep 5:3 bolyp, setke dop bergende, sol múmkindigin paıdalana almady. Qarqyn alǵan Býblık des bermedi – 7:5.

Eki saǵat 14 mınýtqa sozylǵan básekede A.Býblık 12 eıspen birge 13 breık-poınttyń beseýin óz esebine jazdy. Fýchovıch 6 eıs, 2 breıkpen kózge tústi.

Aleksandr Býblık tórtinshi aınalymǵa shyǵý úshin álemniń 62-raketkasy, argentınalyq Tomas Martın Etcheverrımen talasady.

Taǵy bir qazaqstandyq tennısshi, álemdik reıtıngide 97-oryndaǵy Aleksandr Shevchenko úshinshi aınalymnan tys qaldy. Ol ekinshi kezdesýinde álemniń 29-raketkasy, amerıkalyq Lerner Tıenge jol berdi – 2:6, 7:5, 1:6, 0:6.

Budan buryn Elena Rybakınanyń bastapqy kezdesýin jeńispen aıaqtaǵanyn jazǵan edik.