Aýyldyq eldi mekender úshin jeke turǵyn úı baǵdarlamasy ázirlene me
ASTANA. KAZINFORM – Bıyldan bastap satyp alynatyn páterlerdiń ornalasqan jerin jergilikti atqarýshy organdar ózderi anyqtaıdy. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Aýyldyq aýmaqtardy keshendi damytý maqsatynda aýyldyq eldi mekenderdiń ınjenerlik jáne áleýmettik ınfraqurylymyn jańǵyrtýǵa baǵyttalǵan «Aýyl - el besigi» arnaıy baǵdarlamasy iske asyrylyp jatyr. Infraqurylymdyq sharalarmen qatar elde bıýdjet qarajaty esebinen 2023-2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy aıasynda kezekte turǵan azamattarǵa jalǵa beriletin turǵyn úı salý jáne satyp alý tetigi kózdelgen,- dedi Premer-mınıstr.
Onyń málimetinshe, qazirgi tańda qurylys salýshylardan daıyn turǵyn úı satyp alý tetigi óńirlerde belsendi qoldanylady. Sebebi bul tetik jalǵa beriletin turǵyn úıdi aýdandar boıynsha teń bólýge jáne halyqtyń áleýmettik osal toptary arasynda turǵyn úıge degen suranysty tıimdi jabýǵa múmkindik beredi.
- 2025 jyldyń qorytyndysy boıynsha atalǵan baǵyt aıasynda 14,5 myń páter, onyń ishinde aýyldyq eldi mekenderde 6,5 myń páter satyp alyndy. Alaıda, 2026 jyldan bastap jalpy sıpattaǵy transfertter aıasynda shyǵystar jergilikti bıýdjetterge beriletin bolady. Respýblıka boıynsha 2026 jyly 72 mlrd teńge (3,5 myń páter), 2027 jyly 86,2 mlrd teńge (3,8 myń páter), 2028 jyly 87,7 mlrd teńge (3,6 myń páter) bólingen. Osylaısha satyp alynatyn páterlerdiń ornalasqan jerin jergilikti atqarýshy organdar ózderi anyqtaıtyn bolady, - dedi Oljas Bektenov.
Úkimet basshysy qazirgi ýaqytta aýyl turǵyndaryn qoldaý «Naýryz» ıpotekalyq baǵdarlamasy arqyly júzege asyrylatynyn aıtady. Onyń aıasynda jyljymaıtyn múliktiń qaıtalama naryǵynda turǵyn úı satyp alý múmkindigi bar.
- 2026 jylǵy 1 qańtardaǵy jaǵdaı boıynsha «Naýryz» baǵdarlamasy iske asyryla bastaǵannan beri 435,7 mlrd teńge somasyna 16 370 ótinim, onyń ishinde aýyldyq eldi mekenderde 41,4 mlrd teńge somasyna 1 653 ótinim kelisildi. Osylaısha, «Aýyl - el besigi» jobasyn iske asyrýmen qatar elde qoldanystaǵy tetikter jumys isteıdi. Bul rette aýyldyq eldi mekender úshin qosymsha jeke turǵyn úı baǵdarlamasyn ázirleý qoldanystaǵylaryn qaıtalaý dep sanaımyz,- dedi ol.
Buǵan deıin Oljas Bektenov depýtattardyń jas otbasylarǵa jeke baspana baǵdarlamasy ázirleý usynysyna jaýap bergen edi.