Aýyldyq eldi mekender úshin biryńǵaı tsıfrlyq platforma engiziledi
ASTANA. KAZINFORM – Aýyldyq eldi mekender úshin biryńǵaı tsıfrlyq platforma engiziledi. Bul týraly Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«Aýyldyq aýmaqtardy damytý salasyndaǵy memlekettik organdar arasyndaǵy úılestirýdiń tıimdiligin arttyrý maqsatynda Úkimet 2023-2024 jyldarǵa arnalǵan aýyldyq aýmaqtardy damytý tujyrymdamasyn bekitti. Ol Ulttyq ekonomıka mınıstrliginiń úılestirýimen iske asyrylýda. Tujyrymdamany iske asyrý úshin naqty merzimder, oryndaýshylar jáne taǵy basqalary aıqyndalyp, 56 is-sharany iske asyrýdy kózdeıtin Іs-qımyl jospary ázirlendi. Osylaısha, tujyrymdamany iske asyrý aıasynda Úkimet ortalyq memlekettik jáne jergilikti atqarýshy organdardyń aýyldyq aýmaqtardy damytý jáne olardy odan ári damytý jónindegi tásilderdi ázirleý bóligindegi qyzmetin úılestiredi», - dedi atap ótedi Úkimet basshysy jaýabynda.
Sondaı-aq onyń atap ótýinshe, aýyl turǵyndarynyń turmys sapasyn jaqsartýdy baǵalaý maqsatynda jyl saıyn óńirlik standarttar júıesine sáıkes aýyldardyń ıgiliktermen jáne qyzmettermen qamtamasyz etilýine taldaý jasalady. Aýyldyq aýmaqtardaǵy memlekettik organdar jumysynyń tıimdiligi únemi baǵalanyp otyrady. Qol jetkizilgen nátıjelerge júıeli monıtorıng júrgiziledi. Munyń ózi is-qımyldardy túzetýge jáne olardyń nátıjeliligin arttyrýǵa múmkindik beredi.
«Budan basqa, qazirgi ýaqytta barlyq óńirler men aýyldyq eldi mekender úshin biryńǵaı tsıfrlyq platformany engizý boıynsha jumys júrgizilýde, aýyldyń tsıfrlyq kartasy ázirlenýde. Bul onlaın-rejımde AEM-niń áleýmettik-ekonomıkalyq damýyna, memlekettik organdar arasyndaǵy birlesken josparlaýǵa jáne jedel sheshimder qabyldaýǵa monıtorıng pen baqylaý júrgizýge múmkindik beredi. Sonymen qatar qazirgi ýaqytta óńirlik saıasatty damytýdy jetildirý boıynsha jumystar júrgizilýde. Atalǵan jumystar aıasynda eldi aýmaqtyq-keńistikte damytý boıynsha, onyń ishinde shaǵyn jáne monoqalalardy, aýyldyq aýmaqtar men aglomeratsııalardy damytý saıasatyn aıqyndaı otyryp, jańa tásilderdi ázirleý, sondaı-aq memlekettik basqarýdyń barlyq deńgeılerin eskere otyryp, ortalyq pen óńirdiń ózara is-qımyl problemalaryna keshendi taldaý júrgizilýde», - dedi Oljas Bektenov.
Buǵan deıin 2025 jyldyń naýryzynan qonys aýdarýshylarǵa memlekettik qoldaý sharalaryn kórsetý qyzmetteri avtomattandyrylatyndyǵyn jazǵan edik.
