Aýyldardy kórkeıtýge úles qosyp jatqan kásipkerlerdiń kóp bolǵany jaqsy — Oljas Bektenov
ASTANA. KAZINFORM — Qazaqstan Premer-Mınıstri Oljas Bektenov óńir men elimizdiń azyq-túlik qaýipsizdigin qamtamasyz etip otyrǵan «En-Dala» iri aýyl sharýashylyǵy kásipornynyń qyzmetimen tanysty.
Seriktestik aýyl sharýashylyǵy daqyldaryn ósirýmen jáne sút óndirýmen aınalysyp, halyqty jyl boıy jumyspen qamtýda. Taýarly sút fermasy AÓK jobalaryna nesıe berý baǵdarlamasy sheńberinde memlekettiń qarjylyq qoldaýymen qurylǵan.
Áleýmettik jaýapkershilik aıasynda «En-Dala» JShS búginde jumysshylarǵa turǵyn úı salyp jatyr, buǵan deıin balabaqsha turǵyzǵan bolatyn. Áleýmettik salaǵa jáne aýyldy abattandyrýǵa kóńil bólinýde.
Premer-Mınıstr aýyl turǵyndarynyń turmysyn túzeý maqsatynda mundaı sharýashylyqtar tájirıbesin taratý men keńeıtýdiń mańyzdy ekenin atap ótti.
«Memleket basshysy Qazaqstan halqyna Joldaýynda aýyldardy kórkeıtý jáne aýyl turǵyndaryn turaqty jumyspen qamtý sharalaryn jandandyrýdy tapsyrdy. Bul mindetti, eń aldymen, mal sharýashylyǵyn qarqyndy damytý arqyly sheshýge bolady, óıtkeni AÓK-tiń bul sektory maýsymdyq aýyl sharýashylyǵy jumystaryna qaraǵanda jyl boıy jumyspen qamtýǵa múmkindik beredi. Aýyldardy kórkeıtýge úles qosyp jatqan sharýa qojalyqtaryna jan-jaqty qoldaý kórsetemiz. Mundaı kásipkerlerdiń kóp bolǵany jaqsy, sonda tek azyq-túlik qaýipsizdigi qamtamasyz etilip qana qoımaı, aýyldaǵy turmys sapasy da jaqsarady», — dep atap ótti Oljas Bektenov.
Sonymen qatar iri qalalardaǵy sııaqty aýyldarda áleýmettik ınfraqurylymnyń belsendi damýyn eskere otyryp, eldi mekenderdi senimdi elektr energııasy kózderimen qamtamasyz etý máseleleri týyndaıdy.
Aýyl turǵyndary Premer-Mınıstrmen kezdesýde osy taqyrypty talqylady. Onda Qazaqstanda AES salý máselesi de aıtyldy.
Oljas Bektenov turǵyndardyń saýaldaryna jaýap berip, atom energetıkasyn damytý ekonomıkanyń ósýine ǵana emes, tarıfter turaqtylyǵyna da áser etetinin basa aıtty.
Atom elektr stasasynda óndiriletin elektr energııasynyń quny otynnyń turaqty baǵasy men energııa syıymdylyǵyna, sondaı-aq stansanyń uzaq qyzmet etý merzimine baılanysty basqa energııa kózderimen salystyrǵanda joǵary bolmaıdy.
«Úkimet Prezıdenttiń aýyldyq jerlerde áleýmettik jáne ınjenerlik ınfraqurylymdy damytý jónindegi tapsyrmalaryn tolyq ári sapaly oryndaýdy óz mindeti dep sanaıdy. Jańa ónerkásiptik ósý núktelerin qurý úshin biz turaqty energııamen qamtamasyz etýdi qosa alǵanda, barlyq máselelerdi sheshýimiz kerek. Infraqurylym aýyldardyń ekonomıkalyq áleýetin keńeıtetinin eskersek, atom energetıkasy sııaqty qosymsha generatorlardy qurý óńirlerdiń odan ári damýyna qýatty serpin bolmaq. Elimizde halyq sany artyp, ónerkásip damýda, jańa kásiporyndar men áleýmettik nysandar ashylyp jatyr. Energetıka júıesi úshin turaqtylyq pen táýlik boıy jumys isteý mańyzdy, muny tek atom elektr stansasy ǵana qamtamasyz ete alady», — dep atap ótti Oljas Bektenov.
Talqylaý qorytyndysy boıynsha sharýalar Prezıdenttiń Qazaqstan halqyna Joldaýynda aıtylǵan bastamalaryna qoldaý bildirip, jyl boıyna halyqty jumyspen qamtý sharalarynyń alǵashqy oń nátıjelerin atap ótti.
