Aýyldarda medıtsınalyq kómek sapasyn jaqsartýda ilgerileý bar ma
ASTANA. KAZINFORM – Densaýlyq saqtaý mınıstrligi aýdandyq deńgeıdegi medıtsına sapasyn jaqsartýǵa qatysty túsinik berdi.
- Memleket basshysynyń tapsyrmasy aıasynda qazirgi ýaqytta aýyldyq densaýlyq saqtaýdy jańǵyrtý jónindegi ulttyq jobany iske asyrý jalǵasyp keledi. Ulttyq jobada jetispeıtin dárigerlik ambýlatorııalardy, feldsherlik-akýsherlik pýnktterdi (FAP), múldem bolmaǵan nemese eldi mekenderde eskirgen nysandardyń ornyna medıtsınalyq pýnktter salý qarastyrylǵan. Bul turǵyda 655 medıtsınalyq-sanıtarııalyq alǵashqy kómek (MSAK) obektisiniń qurylysy qarastyrylǵan, onyń ishinde 460 obektiniń qurylysy aıaqtaldy. Sonyń arasynda 99 nysan 2023 jyly jáne 361 nysan 2024 jyly aıaqtaldy. 2025 jyly aýyldyq jerlerde qalǵan 195 MSAK obektisiniń qurylysyn aıaqtaý josparlanyp otyr, - delingen mınıstrliktiń Kazinform agenttigine bergen jaýabynda.
Aýyldyq obektilerdi salý kezinde alǵash ret jobalaýǵa birizdendirilgen tásil qoldanylady, ıaǵnı olarda ambýlatorııalyq ońaltý kabınetteri, telemedıtsına, dárihana pýnktteri, kúndizgi statsıonarlar qarastyrylǵan. Bul rette, jabdyqpen jaraqtandyrý, syrtqy árleý, sáýlettik kelbeti jáne basqa da parametrler eskeriledi. Barlyq MSAK obektilerinde oblystyq jáne respýblıkalyq klınıkalardyń jetekshi dárigerlerimen telemedıtsınalyq konsýltatsııalar uıymdastyrý úshin kompıýterlik jáne medıtsınalyq tehnıka kózdelgen. Ulttyq joba aıasynda aýyldyq medıtsınalyq mekemelerdi zamanaýı jabdyqtarmen, sonyń ishinde dıagnostıkalaýǵa arnalǵan apparattarmen, zerthanalyq qurylǵylarmen, sondaı-aq telemedıtsınaǵa arnalǵan júıelermen jabdyqtaý jáne jańartý iske asyrylyp jatyr. Bul óz kezeginde turǵyndarǵa aýyldan tys jerge shyqpaı, sapaly medıtsınalyq qyzmet alýǵa múmkindik beredi.
Atap aıtqanda, bilikti jáne shuǵyl medıtsınalyq kómektiń sapasy problemasyn sheshý úshin Ulttyq jobanyń ekinshi mindeti aıasynda 32 aýdandyq aýrýhanany jańǵyrtý jumystary jalǵasyp jatyr.
- 2023 jyldan bastap Ulttyq joba aıasynda 16 aýdandyq aýrýhanany jaraqtandyrý úshin 1800 medıtsınalyq tehnıka satyp alyndy. 2025 jyly 14 aýdandyq aýrýhanany medıtsınalyq jabdyqtarmen qamtamasyz etýdi jalǵastyrý josparlanyp otyr, olar - angıograftar, MRT, KT. Jalpy, búgingi tańda aýyl halqy medıtsınalyq kómekti alýyn jaqsartý boıynsha sharalar qabyldandy. 2024 jyldyń qorytyndysynda aýyldyń statsıonarlarynda 960 myń patsıent emdelip, 45 mln-nan astam konsýltatsııalyq-dıagnostıkalyq qyzmet kórsetildi. Aýyldy jerlerdiń turǵyndaryna medıtsınalyq ońaltý boıynsha 665 myń qyzmet kórsetildi, - dep atalyp ótken vedomstvo aqparatynda.
Budan bólek, shalǵaıdaǵy stantsııalarda turatyn turǵyndarǵa medıtsınalyq kómekti arttyrý úshin jyl saıyn «Salamatty Qazaqstan» medıtsınalyq poıyzy áleýmettik jobasy iske asyrylyp keledi. 2024 jyly medıtsınalyq poıyz Qazaqstannyń 17 oblysynyń 128 stantsııasyn qamtydy. Aýyl halqynyń 104 myńnan astam azamaty tekserildi, onyń ishinde 20 552 bala bar. Bul kórsetkish onyń aldyndaǵy jylmen salystyrǵanda 20%-ǵa artyq.
- 2024 jyly jyljymaly medıtsınalyq keshen (JMK) avtokóligi 3271 aýyldy eldi mekenge shyqty. 1,2 mln aýyl turǵyny JMK-da medıtsınalyq kómek aldy. JMK arqyly 656 myń dıagnostıkalyq zertteý, beıindi mamandardyń 1,2 mln konsýltatsııasy, 332,8 myń zerthanalyq zertteý júrgizildi. Aýyl turǵyndary úshin dári-dármekpen qamtamasyz etý bóliginde medıtsınalyq uıymdar bazasynda 172 dárihana pýnkti jáne 694 jeke menshik dárihana, sondaı-aq 2 jyljymaly dárihana pýnkti ashyldy, - delingen vedomstvo aqparatynda.
Buǵan deıin aýyldarda dáriger tapshylyǵy máselesi qalaı sheshilip jatqanyn jazǵan edik.