Aýylda qolónerge qushtar balalar kóp – muǵalim
AQTÓBE. KAZINFORM – Yrǵyz aýdany Mamyr aýylyndaǵy negizgi mekteptiń muǵalimi Qanatbek Júnisov shalǵaı jerde otyryp-aq aǵashtan, áınekten, temirden túrli buıym jasaıdy. Ol aýyl balalaryna sheberliktiń qyr-syryn úıretip júr.
— Ózińiz týraly aıtyp berseńiz…
— Yrǵyz aýdany Nura aýylynda týyp óstim. 2010 jyldan bastap Mamyr aýylyndaǵy klýbta jumys istedim. Sóıtip qyzmet babymen kórshi aýylǵa kóshtim. Qazirgi kezde Mamyr negizgi orta mektebinde kórkem eńbek pániniń muǵalimimin. Bul qyzmette júrgenime 5 jyldaı boldy. Negizi ózim Shymkentte bilim aldym. Mamandyǵym da ózge. Bastaýysh synypqa ınformatıka páninen sabaq berýge bolady. Sol dıplommen jumysqa kirgenimmen, eptiligimdi baıqaǵan basshylyq kórkem eńbek pánin qosyp berdi. Bul ózimniń janyma jaqyn sala.
— Demek arnaıy bilim almasańyz da aǵash, temir, túrli plastıkalyq zattarmen jumys isteý jolyn bilesiz ǵoı…
— Iá, men úshin qıyn nárse joq. Eger túsinbesem, ilimin bilmesem áleýmettik jelige júginemin. Onda qyzyqtyń bári bar. Qazirgi kezde Mamyrdaǵy mektepte 40-qa jýyq bala bar. Oqýshylarǵa kórkem eńbek páninde aǵashtan túrli buıym jasaýdy úıretemin. Jetistigimiz de bar. Oqýshylarym aýdan, oblystan, respýblıkadan júldeler alyp júr. Ózim qolóner sheberleriniń basyn biriktirgen «Altyn tumar» kitabyna endim. Sonymen birge 2024 jyly Etnodızaınerler odaǵynyń múshesi boldym. Eýrazııalyq dızaınerler odaǵynyń da múshesimin. Ózimdi alǵa súıreı bermeı, kóbine oqýshylardy baıqaýlarǵa qatystyramyn.
— Shákirtińiz kóp pe?
— Aýdanda kórkemsýret mektebi bar. Ózim sonyń fılıalynda jumys isteımin. Qazir 12 bala dáris alady. Bastysy — oqýshylar qaýipsizdigi. Sol úshin de balalardyń qolyn kesip, jaralaıtyn qural-jabdyqty ustatpaımyn. Al aǵashty aramen kesý, súrgileý, egeýqummen ysqylaýdy ózderi-aq ilip áketedi. Tek aǵash, temir emes, súıekten de túrli buıym jasaımyz. Oıý salyp, kádesyılar daıyndalady.
— Taǵy bir erekshe týyndy bar. Ol sizdiń kartınalaryńyz. Qarasaq, bir kartınada eki maǵyna bar.
— Áınek, aǵash, jelim. Ony jasap shyǵýǵa osy úsh nárse jetkilikti. Qattama taqtaıdy alyp, sýretti kúıdirip salyp alamyz. Keıin áınek qajet bolady. Ony jelimmen japsyramyz. Munyń bári lezde tabyla qoımaıdy. Sondyqtan turmystyq qoldanystan bosaǵanyn paıdalanamyz, qajettisin satyp alamyz. Aýdan oblys ortalyǵynan, aýyl aýdannan shalǵaı jatqan soń ony jetkizý de ońaı sharýa emes. Degenmen asa qajet bolǵanda alyp, jańa dúnıeler jasap shyǵaramyz. Mundaı kartınalar kóp. Máselen balyq pen balyq aýlap otyrǵan adam, jylqydaǵy qyz beınesin kóre alasyz. Keıbiri oı ushqyrlyǵynan týyndasa, keıbiri burynǵy sheberlerdiń týyndylary. Ony áleýmettik jeli arqyly taýyp, jasap shyǵaramyn. Bul buıymdardy unatqan adamdarǵa syılap ta jiberemiz.
— Taǵy bir jobańyz — kıiz úı úlgisi. Aqyldy jobanyń artyqshylyǵy nede?
— Kıiz úıdiń úlgisin birer jyl buryn jasadym. Ony arnaıy konkýrsqa daıyndap, aýdan ortalyǵynda tanystyrdym. Aqyldy kıiz úı kúnnen qýat alady. Mýzyka oınap, jaryǵy janady. Qajet kezde uıaly telefondy da qýattap alýǵa bolady. Kıiz úı maketinde keli-kelisap, dıirmen, qazan-oshaqtyń bárin kórýge bolady. Bilmegen qala balasyna ata-babamyzdyń, aýyldyń keıpin kóz aldyna alyp keldim dep oılaımyn. Ony qoldanystaǵy materıaldardan jasap shyǵardym. Aǵashty áıelder qaýymy ashanada túrli taǵam daıyndaýǵa paıdalanady. Al men aǵash úıdiń keregesin, ýyǵyn jasadym. Qazir týyndym mýzeıde tur. Endi keme maketin jasap shyqqym keledi.
— Aýyl balalary shynymen de qolónerge qyzyǵy ma?
— Aýylda qolónerge qushtar balalar kóp. Oqýshylar ǵana emes, muǵalimder, turǵyndar da meniń qolymnan shyqqan dúnıelerge qyzyǵady. Qyzyqqan soń da úıirmege qalmaı kelip, jańa nárseler úırenedi. Qulshyǵysy jaqsy. Biz túrli zattar jasap qana qoımaı, mektep ishin jabdyqtaýǵa da kómektemesiz. Ár synyp ishinde balalar men meniń qolymnan shyqqan dúnıe bar.
