Aýylda baspana salý shyǵyndaryn sýbsıdııalaý qaǵıdalaryna ózgeris engizile me – Bektenov jaýaby
ASTANA. KAZINFORM – Májilis depýtattary jumys berýshilerdiń aýyldyq jerde qyzmetkerlerine turǵyn úı salý shyǵyndaryn sýbsıdııalaý qaǵıdalaryna ózgerister engizýdi usynǵan edi. Osy usynysqa Premer-Mınıstr Oljas Bektenov jaýap berdi.
- Búgingi tańda aýyldarda turǵyn úıdiń qoljetimdiligin arttyrý maqsatynda Ónerkásip jáne qurylys mınıstriniń 2024 jylǵy 5 tamyzdaǵy № 289 buıryǵymen aýylda, kentte, aýyldyq okrýgte jaldamaly turǵyn úı salǵan jumys berýshilerdiń shyǵyndaryn sýbsıdııalaý qaǵıdalaryna eldi mekenniń ornalasý qashyqtyǵy (keminde 30 shaqyrym) týraly talapty alyp tastaý bóliginde ózgerister engizildi. Osylaısha, Respýblıkalyq bıýdjet komıssııasynyń sheshimimen 2028 jylǵa deıin jyl saıyn 200 turǵyn úı qurylysyna jumsalatyn jumys berýshilerdiń shyǵyndaryn sýbsıdııalaýǵa 1 mlrd teńge somasynda qarjylandyrý qoldaý tapty, - dedi Úkimet basshysy depýattyq saýalǵa bergen jaýabynda.
Sonymen qatar ol túzetýler qabyldanǵan sátten bastap Shyǵys Qazaqstan (jalpy somasy 55 mln teńgege 11 turǵyn úı), Qyzylorda (10 mln teńge somasyna 2 turǵyn úı), Batys Qazaqstan oblystarynyń (5 mln teńge somasyna 1 turǵyn úı) ákimdikteri ýákiletti organ maquldaǵan áleýetti qatysýshylardan 14 ótinim engizgenin atap ótti.
- Jalpy, aýylda turǵyn úı qurylysyna arnalǵan shyǵyndardy sýbsıdııalaýdyń qoldanystaǵy qaǵıdalary 75-ten 100 sharshy metrge deıingi aýmaqtaǵy turǵyn úı qurylysyna jumsalatyn shyǵyndardy jabýǵa múmkindik beredi. Qazirgi ýaqytta qyzmetkerler úshin balama retinde basqa da turǵyn úı baǵdarlamalary bar ekenin qosymsha atap ótemiz. Osylaısha, aýyldyq jerlerde turǵyn úıge qoljetimdilikti arttyrý maqsatynda 2024 jylǵy 5 maýsymynan bastap, «Otbasy bank» AQ-tyń «Asyl meken» ıpotekalyq baǵdarlamasy iske qosyldy. Sondaı-aq 2024 jylǵy 1 mamyrdan bastap iske qosylǵan «Naýryz» baǵdarlamasy boıynsha aýyldyq jerlerde qaıtalama naryqta turǵyn úı satyp alýǵa múmkindik bar. Úkimet aýyldyq jerlerdegi qyzmetkerler úshin turǵyn úı qurylysyna jumsalatyn jumys berýshilerdiń shyǵyndaryn óteý boıynsha túbegeıli sharalar qabyldaǵanyn eskere otyryp, qoldanystaǵy qaǵıdalarǵa ózgerister engizýge áli erte dep esepteımiz, - dedi Oljas Bektenov.
Aıta keteıik, taıaýda Májilis depýtaty Erlan Saıyrov Úkimetke aýyl, aýdan turǵyndary úshin tómendetilgen mólsherlemesi 5%-ǵa deıin jáne eń tómengi bastapqy jarnasy 10%-dan bastalatyn jeńil ıpotekalyq baǵdarlama ázirleýdi usynǵan edi.