Aýyl sharýashylyǵy ónimderi arasyndaǵy ózara saýda kórsetkishi 59%-ǵa artty — AShM
ASTANA. KAZINFORM – Aýyl sharýashylyǵy mınıstri Aıdarbek Saparov Italııaǵa jumys sapary aıasynda jáne Birikken Ulttar Uıymynyń Azyq-túlik jáne aýyl sharýashylyǵy uıymynyń (FAO) 44-sessııasyna qatysty. Bul týraly vedomstvonyń baspasóz qyzmeti málim etti.
Mınıstr Eýropa elderiniń aýyl sharýashylyǵy vedomstvolarynyń basshylarymen, sonyń ishinde Estonııa, Italııa jáne Latvııa ókilderimen birqatar kezdesýler ótkizdi.
Estonııanyń aımaqtyq ister jáne aýyl sharýashylyǵy mınıstri Hannes Terraspen ótkizilgen ekijaqty kezdesýde Aıdarbek Saparov Qazaqstannyń Estonııamen yntymaqtastyqty tereńdetýge múddeli ekenin jetkizdi.
Kezdesýde agrarlyq ónimder saýdasyna erekshe nazar aýdaryldy. 2025 jyldyń alǵashqy tórt aıynda agroónerkásiptik saladaǵy taýar aınalymy alty esege ósti. Bul kórsetkishtiń artýyna qazaqstandyq raps tuqymdary men kúnjara eksportynyń ulǵaıýy sebep boldy.
— Yntymaqtastyqtyń keleshegi zor baǵyttarynyń biri — mal sharýashylyǵy, naqtyraq aıtqanda, sút baǵytyndaǵy asyl tuqymdy iri qara maldy ımporttaý. Qazaqstan agroónerkásiptik keshende jeńildetilgen nesıe berý baǵdarlamasyn iske asyryp jatyr, oǵan sút-taýarly fermalardy qarjylandyrý da kiredi. Biz Estonııanyń ferma avtomattandyrýdaǵy, ónimdiligi joǵary genetıkany qoldanýdaǵy tájirıbesin zertteýge, sondaı-aq zamanaýı sút-taýarly fermalar (STF) qurý jáne sútti qaıta óńdeý boıynsha birlesken jobalardy júzege asyrýǵa múddelimiz, — dedi mınıstr.
2019 jyldan beri Qazaqstanǵa negizinen golshtın tuqymdy 1654 bas asyl tuqymdy iri qara mal ákelindi.
Italııanyń aýyl sharýashylyǵy, azyq-túlik qaýipsizdigi jáne orman sharýashylyǵy vıtse-mınıstrimen ótken kezdesýde agrarlyq saladaǵy ekijaqty yntymaqtastyqty keńeıtý múmkindikteri talqylandy.
Aıdarbek Saparov aýyl sharýashylyǵy ónimderi arasyndaǵy ózara saýdanyń ósip kele jatqanyn atap ótti: 2025 jyldyń alǵashqy toqsanynda bul kórsetkish 59%-ǵa artyp, 105,9 mln AQSh dollaryna jetti.
Máselen, Qazaqstannan eksporttalǵan bıdaı kólemi 47%-ǵa artyp, 247,3 myń tonnany qurady, burshaq daqyldary — 103 ese ósip, 13,7 myń tonnaǵa jetti, kúnjara — 0-den 3,4 myń tonnaǵa deıin artty.
Taraptar 2024 jylǵy qańtarda Prezıdent Qasym-Jomart Toqaevtyń Italııaǵa jasaǵan resmı sapary kezinde qol jetkizilgen ýaǵdalastyqtardyń oryndalýyn talqylady. Atap aıtqanda, bul — S. Seıfýllın atyndaǵy Qazaq agrotehnıkalyq ýnıversıteti bazasynda eýropalyq sapa standarttaryna kóshý jáne organıkalyq ónim óndirý boıynsha ozyq tájirıbe ortalyqtaryn (Excellence Centers) qurý, sondaı-aq ıtalııalyq kompanııalarmen birlesken ınvestıtsııalyq jobalardy iske asyrý máseleleri boldy.
Latvııanyń aýyl sharýashylyǵy mınıstri Armands Kraýzemen bolǵan kelissózderde agroónerkásiptik saladaǵy ekijaqty yntymaqtastyqty keńeıtý joldary, sonyń ishinde ozyq tehnologııalarmen almasý, jetkizý logıstıkasy jáne ǵylymı-bilim berý yntymaqtastyǵy máseleleri qarastyryldy.
Aıta keteıik, Qazaqstanda aýyl sharýashylyǵy sanaǵynyń bastalýyna týra bir aı qaldy.