Aýyl sharýashylyǵy qyzmetkerleri kúnine oraı 200-den astam aqmolalyq marapattaldy
KÓKShETAÝ. KAZINFORM - Búgin Kókshetaýda birinshi óńirlik forým ótti, onda úzdik agrarshylar men óndiris ozattary, eńbek sińirgen qyzmetkerler men agronomdar, mal ósirýshiler, fermerlik sharýashylyqtar men aýyl sharýashylyǵy kásiporyndarynyń basshylary jınaldy.
Aýyl sharýashylyǵy salasynyń qyzmetkerlerin quttyqtaı otyryp, oblys ákimi Marat Ahmetjanov agrarlyq sektordyń óńir ekonomıkasyndaǵy mańyzdy rólin atap ótti. Ol bul salanyń jetistikteri – jerge eńbek sińirgen, óz isine adal jáne kásibı mamandardyń qajyrly eńbeginiń nátıjesi ekenin aıtty.
«Aqmola oblysy – Qazaqstanda dándi jáne maıly daqyldar óndirýde kóshbasshy óńir. Aqmola oblysyndaǵy astyq ónimderi – bul óńirdiń eldegi aýyl sharýashylyǵy óndirisiniń ortalyǵy mártebesin rastaıtyn mańyzdy jetistik. Dıqanshylardyń eńbegi joǵary qurmetke laıyq, óıtkeni olardyń kúshi eldiń azyq-túlik qaýipsizdigin qamtamasyz etedi. Ótken jyly oblys agrarııleri úlken jetistikterge jetti. Biz sizdermen maqtanamyz jáne shynaıy alǵysymyzdy bildiremiz», – dedi Marat Ahmetjanov.
Óńir basshysy óz sózinde atap ótkendeı, aýyl sharýashylyǵy salasyndaǵy óńirdiń jalpy ónimi 828 mıllıard teńgege jetti. Boljamdarǵa sáıkes, aǵymdaǵy jyldyń sońyna deıin bul kórsetkish 1 trıllıon teńgeden senimdi túrde asady. Bıylǵy egin egý naýqany men oraq naýqany kezindegi kúrdeli tabıǵı klımattyq jaǵdaılarǵa qaramastan, oblysta sońǵy onjyldyqtardaǵy rekordtyq 6,6 mıllıon tonna astyq jınaldy. Ortasha ónimdilik 14,1 tsentner/gektardy qurady, Qazaqstan astyǵynyń 30%-y Aqmola oblysynda óndirildi.
Oblys ákimi aýyl sharýashylyǵyn jańǵyrtý, jańa tehnologııalardy engizý jáne agrarıılerge qoldaý kórsetýdi arttyrý máselelerine erekshe nazar aýdardy. Ol agrarlyq sektordy damytý úshin qolaıly jaǵdaılar jasaý boıynsha jumystar jalǵasatynyn, onyń ishinde memlekettik qoldaýdy keńeıtý, ınfraqurylymdy jańartý jáne mamandardy oqytý sharalary júzege asyrylatynyn aıtty.
Astana turǵyndaryn aýyl sharýashylyǵy ónimderimen turaqty qamtamasyz etý úshin aıtarlyqtaı mańyzy bar azyq-túlik beldeýine oblystyń 17 aýdany endi. Qazirgi ýaqytta 125 oblystyq kásiporyn elordadaǵy 44 iri saýda núktesine ónim jetkizýde.
Aýyl sharýashylyǵy qyzmetkerleriniń eńbegi laıyqty baǵalandy. El Prezıdentiniń Jarlyǵymen toǵyz aqmolalyq agrarıı memlekettik marapattarǵa ıe boldy. Óndiris úzdikteri – saýynshylar, mehanızatorlar, agronomdar, júrgizýshiler, qus ósirýshiler jáne basqa da eńbek ozattary qurmet gramotalarymen, alǵys hattarmen jáne aqshalaı syıaqymen marapattaldy. Gorodetskıı, Raıskıı jáne Kaspıev eńbek áýletterine avtokólik syıǵa tartyldy.
Alǵash ret birqatar agrarııler «Aqmola – eńbek ozaty» tósbelgisimen marapattaldy. Olardyń qatarynda mehanızatorlar Dúısembaı Ysqaqov pen Vladımır Gerasımov, Sotsıalıstik Eńbek Erleri Esilbaı Qadralın men Valentın Şerbakov, eńbek adamy, Birjan sal aýdanynyń qurmetti azamaty Altynaı Bazylova bar.
Saltanatty is-shara merekelik kontsertpen aıaqtaldy.
