Aýyl sharýashylyǵy: Kásipkerler 10 jylǵa deıin 2,5 paıyzdyq jeńildikpen nesıe ala alady

ASTANA. KAZINFORM – Agroónerkásiptik keshenniń 12 basym baǵyty boıynsha 2,5% jeńildikpen bıýdjettik nesıe alýǵa bolady. Bul týraly QR Aýyl sharýashylyǵy mınıstrliginiń baspasóz qyzmeti málimdedi. 

Qazaqstannyń agroónerkásiptik keshenin damytýdy yntalandyrý, jańa óndiristik qýattardy qurý nemese jumys istep turǵandaryn keńeıtý, salanyń ónimdiligi men básekege qabilettiligin arttyrý maqsatynda QR Aýyl sharýashylyǵy mınıstrligi Agroónerkásiptik kesheni salasyndaǵy jobalardy nesıelendirý erejesine ózgerister engizý týraly buıryq qabyldady», - delingen habarlamada.

Ózgerister 12 baǵyt boıynsha jobalardy jeńildikpen qarjylandyrýdy qamtıdy.

Olardyń qatarynda sút-taýar fermalaryn, et baǵytyndaǵy qus fabrıkalaryn, et sharýashylyǵy kásiporyndaryn, kókónis qoımalaryn qurý jobalary bar.

Sondaı-aq qazirgi zamanǵy sý únemdeý tehnologııalaryn paıdalana otyryp, sýarmaly eginshilikti damytý, ónerkásiptik jylyjaı keshenderi, jemis qoımalary, balyq sharýashylyǵy, balyq óńdeý zaýyttary, qus sharýashylyǵyndaǵy asyl tuqymdy reprodýktorlary, aýyl sharýashylyǵy ónimderin odan ári tereń óńdeý jáne saqtaý kásiporyndary, onyń ishinde jún jáne teri, qaptama materıaldaryn óndirý salalary da memlekettik qoldaýǵa ıe bolady.

Kásipkerler 10 jylǵa deıin 2,5 paıyzdyq jeńildikpen nesıe qarajatyn paıdalana otyryp, óz jobalaryn júzege asyra alady. Nesıeniń eń joǵary somasy 5 mlrd teńgege deıin.

Erejege engizilgen ózgeristermen silteme arqyly tanysa alasyz.