«Aýyl mektebi – sapa alańy» respýblıkalyq jobasyna 1,5 myń mektep qosylady
ASTANA. KAZINFORM – Qazaqstanda mektepterdiń 70%-ǵa jýyǵy aýyldyq jerlerde ornalasqan jáne kópshiligi shaǵyn jınaqty mektepter. Qala men aýyl mektepteri arasyndaǵy bilim sapasynyń alshaqtyǵyn azaıtý maqsatynda 2023 jyldan bastap elimizde «Aýyl mektebi – sapa alańy» jobasy bastalǵan bolatyn.
Onyń ishinde Aqtóbe oblysynda «Tsıfrlyq tehnologııalardy paıdalana otyryp shaǵyn jınaqty aýyl mektepteriniń áleýetin damytý», Almaty oblysynda «Jaratylystaný-matematıkalyq baǵyttaǵy pánder boıynsha bilim berý sapasyn arttyrý», Mańǵystaý oblysynda «Otpan» tirek mektepteriniń jelisin damytý», Ulytaý oblysynda «Ustaz Ulytau» sııaqty óńirlik bastamalar júzege asyrylyp jatyr.
Atap aıtsaq, 2023 jyly Aqtóbe oblysynda 12 tirek mektep pen 134 shaǵyn jınaqty mektep, 2024 jyly Aqmola, Qostanaı, Pavlodar, Batys Qazaqstan jáne Soltústik Qazaqstan oblystarynda taǵy 10 tirek jáne 30 shaǵyn jınaqty mektep jobaǵa qatysty. 2025–2026 oqý jylynda taǵy 1600 aýyl mektebi qosylady dep josparlanyp otyr.
Jobany iske asyrýdyń nátıjesinde mektepterdiń materıaldyq-tehnıkalyq bazasy jańartyldy, zamanaýı pándik jáne tsıfrlyq kabınettermen jabdyqtaldy, sondaı-aq, jyldamdyǵy joǵary ınternetpen qamtamasyz etý sheshimin tapty.
Jobanyń mańyzdy tusynyń biri — onlaın oqytý. Oqýshy men muǵalim sany az aýyl mektepterinde matematıka, fızıka, hımııa, bıologııa jáne aǵylshyn tili pánderinen onlaın sabaqtar ótkiziledi.
— Keıbir aýyl mektepterinde bir muǵalim birneshe pánnen sabaq berip júr. Jańa jobanyń arqasynda tirek mektepteriniń ustazdary shaǵyn jınaqty mekteptegi oqýshylardy onlaın oqytady, ıaǵnı ár pánnen óz isiniń bilikti mamany dáris beredi. Bul balalardyń bilim sapasyn jaqsartyp qana qoımaı, aýyl muǵalimderiniń de kásibı biliktiligin arttyrýǵa múmkindik beredi, — dedi Y.Altynsarın atyndaǵy Ulttyq bilim akademııasynyń prezıdenti Nazıpa Aıýbaeva.
Sonymen qatar muǵalimderge ádistemelik qoldaý kórsetilýde: tsıfrlyq saýattylyq kýrstary oqytylady, tehnologııalardy qoldaný men oqý baǵdarlamalaryn aýyl mektepterine beıimdeý boıynsha trenıngter ótkiziledi. Búginge deıin 10-nan astam respýblıkalyq is-shara uıymdastyrylǵan, bul baǵyttaǵy jumys aldaǵy ýaqytta da jalǵasady.
Aıta ketelik kolledj baǵdarlamalary jańaryp jatqany týraly jazǵan edik.