«Aýyl – El besigi»: Aqtóbe oblysynda kireberis joldardy jóndeý usynyldy

AQTÓBE. KAZINFORM - «Aýyl – El besigi» jobasy aıasynda Aqtóbege 6,6 mlrd teńge bólinedi. Oblys qarjynyń bir bóligin aýylǵa kireberis joldardy jóndeýge bólý týraly usynys berdi.

Bıyl «Aýyl – El besigi» jobasy aıasynda 32 aýylda qurylys jumystary júredi. Barlyǵy 46 jobany iske asyrýǵa 6,6 mlrd teńge bólinedi. Onyń beseýi sport kesheni, 8-i mádenıet úıi. Sonymen birge 3 densaýlyq saqtaý jáne 7 bilim berý nysany da bar. Jospar boıynsha 48 shaqyrymdy quraıtyn 18 jol qurylysy jáne 31 shaqyrym bolatyn 5 ınjenerlik jeli salynady.

- «Aýyl – El besigi» aıasynda eldi mekenderge kireberis jol salýǵa ruqsat etilmeıdi. Óńirimizde avtojoldar sapasynyń ózektiligin eskere otyryp, tizimge bul jumystardy qosý úshin mınıstrlikke tıisti usynys engizildi. Búginde usynys qaralyp jatyr. Sonymen qatar qazirgi tańda 2025 jyldyń jobalar tizimin ázirleýge kiristik. QR Aýyldyq aýmaqtaryn damytý tujyrymdamasyna sáıkes kelesi jyldan bastap tek tirek eldi mekender qoldaý taba alady. Qazirgi tańda oblysymyzda 77 tirek aýyl bar. Jalpy aýyldarǵa basymdyq berý krıterııleri 4 blokqa bólinedi. Olar: demografııalyq, ınfraqurylymdyq, ekonomıkalyq jáne óńirlik standarttar júıesine sáıkestik blogi,- dedi Aqtóbe oblysy ekonomıka jáne bıýdjettik josparlaý basqarmasynyń bólim basshysy Maral Myrjyqbaeva.

Aıta keteıik, «Aýyl – El besigi» jobasy bastalǵaly 187 aýylda qurylys jumystary júrgizildi. Oǵan 28,4 mlrd teńge jumsaldy. Byltyr 45 joba qolǵa alynsa, onyń 8-i mektep qurylysy.