Aýyl balasy, mektebi qandaı táýir, qarashy! — Tuńǵysh ret «Aýyl mektebi» fotokórmesi ótti
ASTANA. KAZINFORM – Elordada «Aýyl mektebi» fotokórmesi ótti. Mundaı is-shara elimizde tuńǵysh ret uıymdastyrylyp otyr. Kazinform tilshisi mundaı erekshe kórmeniń aıshyqtamaǵy, aıtpaǵy ne ekenin bilip qaıtty.
«ÓzgeEpic» kreatıv habynda ótken kórme shalǵaı aýylda ornalasqan bir mekteptiń ómiri men ózgeristerin sıpattaıdy.
Kórmeniń basty ıdeıasy – aýyl mektepterindegi jańashyl bastamalardy kórsetý. Fotokórme óńirlerdegi bilim oshaqtarynyń jańa tehnologııalardy ıgerýin, básekege umtylysyn, jergilikti turǵyndardyń bolmysy men kúndelikti tirshiligin aıshyqtaıdy.
Bul kórmege Jambyl oblysy Jýaly aýdany Baýyrjan Momyshuly aýylynyń Álıhan Bókeıhanov atyndaǵy №15 tirek mektep-lıtseıinde túsirilgen fotosýretter qoıylǵan. Búgingi jıynǵa atalǵan bilim oshaǵynyń dırektory Rýslan Saılaýbaev ta qatysty.
«Bizdiń mektepte 603 bala eki aýysymda bilim alyp jatyr. Tirek mektepter jelisine 2023 jyly kirgen bolatynbyz. Soǵan baılanysty materıaldyq-tehnıkalyq bazamyz tolyqtaı jańaryp, oqýshylarymyz oblystyq jáne respýblıkalyq deńgeıdegi robot tehnıkasy, ǵylymı jobalar saıystarynda júlde ala bastady. Materıaldyq baza jaqsarǵan soń, biz túrli úıirmeler ashtyq. Aıtalyq, telestýdııa, robototehnıkasy, qolóner sheberi, drama óneri, dombyra, shahmat, artstýdııaǵa baılanysty qylqalam sheberi úıirmeleri jumys istep tur. Osyndaı jumystardyń arqasynda aýyldyq jerdegi mektepter men qalalardaǵy mektepterdegi bilim sapasy alshaqtyǵy tómendep keledi. Sol talaptarǵa saı bolǵandyqtan búgingi kórmege bizdiń tirek mektep-lıtseı tańdalyp otyr», - dedi mektep dırektory.
Kreatıv hab dırektory ári joba kýratory Toǵjan Qurmanjanqyzy kórmeniń negizgi maqsatyn aıtyp berdi.
«Joba maqsaty – qala mektepteri men aýyl mektepteri arasyndaǵy úlken kedergini joıý. Aýyldarda da qaladaǵydaı túrli qural-jabdyqtarmen qamtylǵan zamanaýı mektepter bolatynyn, aýylda da ondaı mektep jasaqtaý múmkin ekenin kórsetý. Aýyl balasy, qala balasy degen bólinis bolmaýy kerek. Bul - kóshpeli kórme. Endigi kezekte Túrkistan qalasynda, sosyn Almatyda ótedi. Kórmeniń fotograftary – Áıgerim Begimbet pen Sábına Ábdimálik. Olardyń osyǵan deıin de áleýmettik-aǵartýshylyq baǵyttaǵy kórmesin uıymdastyrǵanbyz», - dedi joba kýratory.
Áýelde «Tirshilik» jobasy arqyly tanylǵan Áıgerim fotograf qana emes, ári jýrnalıst. Fotoapparatynyń obektıvi sýy, joly, jaryǵy joq shalǵaı aýyldardaǵy qońyrqaı tirshilikti nysanaǵa alyp turatyn shyǵarmashylyq ıesi bul joly materıaldyq-tehnıkalyq bazasy ozyq mektepti túsirýge nege qulshyna kirisken? Sóıtsek, onyń da bir syry bar eken.
«Shynymdy aıtsam, men ózim de aýylda eski mektepte bilim aldym. Bizdiń aýylda birde-bir úıirme bolǵan joq. Biz sabaqtan keıin tek úı sharýasymen ǵana aınalystyq. Bizdi damytatyn, ósiretin, shyǵarmashylyǵymyzdy baıytatyn esh nárse bolmady. Bul jobaǵa bizdi shaqyrǵan kezde, árıne, qýandym. Óıtkeni... Men bir jyldary Shymkenttegi Nazarbaev zııatkerlik mektebinde jumys istedim. Sonda mekteptegi múmkindikterdi, balalarǵa jasalǵan jaǵdaıdy, úıirmelerdi, bilim sapasyn kózimmen kórdim. Sodan soń bundaı ıgilikter nege bir ǵana mektepte bolýy kerek degen oıǵa qaldym. Osy kórmege arqaý bolǵan Jýaly aýdanyndaǵy mektepke barǵanda sol NZM-nyń aýyldaǵy úlgisin kórgendeı boldym. Qarańyz, mektepte telestýdııa bar. Oqýshylar ózderi aýyldyń jańalyqtaryn jazady. Kameraǵa ózderi túsiredi, ózderi montajdaıdy, sosyn ózderi mektepterinde ekrannan kórsetedi. ıAǵnı, osylaı aýyl mektepterinde de jaǵdaı jasaýǵa bolatynyn pash etkim keldi, - dedi fotojýrnalıst Áıgerim Begimbet.
Fotokórme «ÓzgeEpic» kreatıv habynyń bastamasymen jáne uıymdastyrýymen jáne Bilim berý salasyn turaqty damytý qory (furo.kz) qoldaýymen júzege asty.
Atap óterligi, Bilim berý salasyn turaqty damytý qory elimizde aýyl men qala mektepterindegi bilim sapasy teńsizdigin azaıtýǵa baǵyttalǵan jobalardy iske asyrady.
Kórme barysynda fotosýretshiler shyǵarmashylyq oılaryn ortaǵa salyp, kórmeniń birneshe keıipkerin tanystyrady.
Aıta keteıik, «Aýyl mektebi» – shalǵaıdaǵy bilim berý mekemeleriniń zııatkerlik áleýetin kópshilikke tanytýǵa, sondaı-aq aýyl mektepteri men oqýshylarynyń damýyna jańa serpin beretin biregeı shyǵarmashylyq joba.
