«Aýyl amanaty» jáne «Aýyl — El besigi» jobalary biriktiriledi

ASTANA. KAZINFORM — Bıyl da 500-ge jýyq aýyldyq aýmaqtarda 176,4 mlrd teńgege 900-den astam joba iske asyrylady. Bul týraly Ortalyq kommýnıkatsııalar qyzmetindegi brıfıngte Ulttyq ekonomıka vıtse-mınıstri Baýyrjan Omarbekov aıtty.

— «Aýyl — El besigi» jobasy — aýyldyq aýmaqtardaǵy ınfraqurylymdy damytýǵa baǵyttalǵan negizgi quraldardyń biri. 2019 jyldan bastap joba aıasynda aýyldardyń ınfraqurylymyn damytýǵa 701 mlrd tenge bólinip, 2,2 myń aýylda 6,6 myńǵa jýyq joba iske asyryldy. Nátıjesinde 5,3 myń shaqyrym kóleminde ınjenerlik jeliler, sondaı-aq 7,9 myń shaqyrym aýylishilik joldar jańǵyrtyldy, sonymen qatar bir qatar áleýmettik nysandar jańadan salyndy nemese qaıta jańǵyrtyldy. Bıyl da 500-ge jýyq aýyldyq aýmaqtarda 900-den astam jobany iske asyrýǵa 176,4 mlrd teńge bólindi. Bul jobalar aýyldardyń ınfraqurylymyn jaqsartýǵa jáne turǵyndardyń ómir súrý sapasyn arttyrýǵa baǵyttalady, — dedi vıtse-mınıstr.

Onyń dereginshe, 2023-2024 jyldary aralyǵynda qarjylandyrýdyń barlyq kózinen 2 trln teńgege jýyq bıýdjet qarajaty bólinip, áleýmettik, ınjenerlik, kóliktik ınfraqurylymdy, qoǵamdyq jáne ekologııalyq qaýipsizdikti damytýǵa baǵyttaldy.

— Qazirgi tańda Ulttyq ekonomıka mınıstrligi aýyldyq aýmaqtardy keshendi damytýǵa arnalǵan memlekettik qoldaý sharalaryn, onyń ishinde «Aýyl amanaty» jáne «Aýyl — El besigi» jobalaryn bir baǵdarlamaǵa biriktirý boıynsha jumystar júrgizip jatyr. Birinshi — «Aýyl Amanaty» jáne «Aýyl — El besigi» jobalaryn iske asyrýdy basym tártippen damý áleýeti bar aýyldarda júzege asyrý usynylyp otyr. Bul basqa aýyldarda iske aspaıdy degen sóz emes. Tek qana basym baǵyttar sol aýyldarǵa den qoıylyp otyrǵandyǵy. Ekinshi — «Aýyl amanaty» jobasy mańyzdy bastama bolǵandyqtan qarjy resýrstaryn strategııalyq túrde bólý, ekonomıkalyq negizdemeni kúsheıtý jáne bólinip jatqan qarjynyń ıgerilýi boıynsha monıtorıngti jetildirýge qatysty sharalar qabyldaý. «Aýyl amanaty» jobalaryn iske asyrý basym tártippen «Aýyl — El besigi» jáne basqa da baǵdarlamalardyń quraldaryn paıdalana otyryp, ınjenerlik jáne áleýmettik ınfraqurylymdy damytýmen sınhrondy túrde júrgiziledi, — dedi Baýyrjan Omarbekov.

Buǵan deıin «Aýyl amanaty» baǵdarlamasy boıynsha BQO respýblıkada kósh bastap turǵanyn jazǵan edik.