«Aýyl amanaty» baǵdarlamasyna qatysý talaptary ózgerdi

PETROPAVL. KAZINFORM – Soltústik Qazaqstan oblysynda bıyl «Aýyl amanaty» baǵdarlamasyn iske asyrý aıasynda óńir turǵyndarynan jalpy somasy 1,3 mlrd teńgege 134 ótinim qabyldady. 

Baǵdarlama operatory «Soltústik» áleýmettik-kásipkerlik korporatsııasynyń málimetinshe, búginde 43 joba qarjylandyrylyp, 478 mln teńge bólingen.

– Qoldaý tapqan jobalardyń qatarynda mal sharýashylyǵy, ósimdik sharýashylyǵy, týrızm salasy, balyq ónimderin qaıta óńdeý, jıhaz daıyndaýǵa arnalǵan jabdyq satyp alý, sondaı-aq avtojýý qyzmetin ashý sııaqty bastamalar bar. Baǵdarlamaǵa oblystyń barlyq aýdandarynyń turǵyndary qatysyp otyr. Jalpy alǵanda, «Aýyl amanaty» baǵdarlamasyn júzege asyrý úshin bıyl óńirge respýblıkalyq bıýdjetten 1,5 mlrd teńge bólingen, - deıdi korporatsııanyń bólim basshysy Talǵat Jumabekov.

Mamannyń aıtýynsha, bıyl baǵdarlamaǵa qatysý talaptary ózgergen. Endi mıkrokredıt alýǵa jumyssyzdar, jeke kásipker retinde tirkelmegen ózin-ózi jumyspen qamtyǵandar, ýaqytsha jumys istemeıtin jeke kásipkerler, otbasylyq kásipkerlikte aqysyz eńbek etetin tulǵalar, sondaı-aq jeke qosalqy sharýashylyqta ónim óndirip, ony satýmen nemese aıyrbastaýmen aınalysatyn, tabysy eń tómengi kúnkóris deńgeıinen tómen azamattar úmitker bola alady.

– Mıkronesıe alýǵa ruqsat berilgennen keıin baǵdarlamaǵa qatysýshy memlekettik kirister organdarynda jeke kásipker retinde tirkelýi tıis. Sonymen birge, nesıe shartynyń búkil merzimi ishinde osy mártebeni saqtaýy mindetti. Kásipkerlik qyzmet nesıe alýshy tirkelgen mekenjaı boıynsha júzege asyrylýy kerek. Baǵdarlama sharttaryna sáıkes, berilgen qarajatqa ǵımarattar men turǵyn úılerdi satyp alý nemese salýǵa, olardy keıin jalǵa berýge, jeńil avtokólik alýǵa, jaqyn týystardan aýyl sharýashylyǵy janýarlaryn satyp alýǵa, sondaı-aq kóterme jáne bólshek saýdamen aınalysýǵa tyıym salynady, - deıdi Talǵat Jumabekov.

Ótinish berýshilerge eń kóbi – 2 500 AEK-ke deıin, ıaǵnı 10,8 mln teńgege deıin nesıe beriledi. Al aýyl sharýashylyǵy ónimderin qaıta óńdeý jáne aýyl sharýashylyǵy kooperatıvterin damytý jobalaryna maksımaldy 8 000 AEK-ke deıin, ıaǵnı 34,6 mln teńgege deıin qarjylandyrý qarastyrylǵan.

Nesıe aýyl sharýashylyǵyna jatpaıtyn bıznes túrleri úshin 5 jylǵa deıin, al aýyl sharýashylyǵy men ónimdi qaıta óńdeý salasyndaǵy jobalar úshin 7 jylǵa deıin beriledi. Negizgi qaryzdy óteýge jeńildik kezeńi mıkronesıe merziminiń 12 aıynan aspaıdy.

Buǵan deıin Qanat Bozymbaev «Aýyl amanaty» boıynsha jeńil nesıeni jedeldetýdi tapsyrǵan edi.