«Aýyl amanaty»: Aqtóbelikterdiń kóbi qus sharýashylyǵyn damytýǵa nesıe alǵan
AQTÓBE. KAZINFORM - Aqtóbede «Aýyl amanaty» jobasy aıasynda 7,7 mlrd teńge nesıe berildi. Turǵyndardyń kóbi aqshany qus ósirýge aldy.
«Aýyl amanaty» jobasy aıasynda barlyǵy 10 mlrd teńgeniń 1900-ge jýyq jobasy maquldandy. Alaıda tek 7,7 mlrd teńge bolatyn 1667 jobaǵa nesıe berildi. Aqtóbe oblystyq aýyl sharýashylyǵy jáne jer qatynastary basqarmasy basshysy Qusaıyn Sársembaıdyń aıtýynsha, qańtar aıynda 51 jobaǵa 250 mln teńge, aqpan aıynda 83 jobaǵa 519 mln teńge qarjy nesıe berildi.
Aqtóbeniń Áıteke bı, Baıǵanın, Yrǵyz aýdandarynda kórsetkish áli de tómen.
- Qus sharýashylyǵy baǵytynda 2,2 mlrd teńgege 569 joba, mal sharýashylyǵynda shamamen 290 mln teńgege 43 joba iske asty. Ósimdik sharýashylyǵyna bólingen qarjy 1 mlrd teńgeden asyp, aýyldarda 98 shaǵyn jylyjaı ashyldy. Kásipkerler óńdeý jáne shaǵyn bıznestiń ózge túrlerin de iske asyrdy. Bul baǵytta 4,1 mlrd teńgege 824 joba qoldaýǵa ıe boldy. Onyń ishinde naýbaıhana men kondıter, shaǵyn sút óńdeý jáne et óńdeý tsehy bar. Qazirgi kezde tapsyrylǵan qujattardaǵy qatelik, nesıe berýdi tejep tur. Búginde 94 jobanyń kepil qujattary boıynsha eskertý bar, - dedi Qusaıyn Sársembaı.
Aqtóbe oblysynyń ákimi Ashat Shaharov sanǵa emes, sapaǵa mán berýdi tapsyrdy. «Aýyl amanaty» jobasy aıasynda alynǵan nesıeniń maqsatty paıdalanýyn rastaıtyn qujattardy da ýaqytyly usynylýy kerek.
- Jobaǵa qatysýǵa nıet bildirgenderdiń qarjylyq jaǵdaıyna qaraý qajet, ıaǵnı, kiris bóligi alǵan nesıesin qaıtarýǵa jetkilikti bolatyndaı bolýǵa tıis. Sondyqtan atalǵan joba aıasynda qarjylandyrý kezinde osy máselelerdiń bárin zerttep, naqty sheshim qabyldaý qajet. Bizge san emes, sapa mańyzdy, - dedi oblys ákimi.
